കോഴിക്കോട്: മാവൂരിൽ വീടിന്റെ മുറ്റത്ത് ഉണക്കാനിട്ടിരുന്ന അടക്ക മോഷ്ടിച്ച മൂന്ന് യുവാക്കൾ പിടിയിലായി. കുന്ദമംഗലം ചേലൂർ സ്വദേശി വിശാഖ്, പെരുവഴിക്കടവ് സ്വദേശി അജയ്, കുറ്റിക്കാട്ടൂർ സ്വദേശി രോഹിത് എന്നിവരെയാണ് മാവൂർ പൊലിസ് അറസ്റ്റ് ചെയ്തത്. സിനിമ സ്റ്റൈലിൽ മോഷണം നടത്തി ബൈക്കിൽ രക്ഷപ്പെടാൻ ശ്രമിക്കുന്നതിനിടെയുണ്ടായ അപ്രതീക്ഷിത ട്വിസ്റ്റാണ് പ്രതികളെ കുടുക്കിയത്.

മാവൂർ മേഖലയിലെ ഒരു വീട്ടിൽ ഉണക്കാനിട്ടിരുന്ന അടക്കയാണ് സംഘം കവർന്നത്. മോഷണത്തിന് ശേഷം അടക്ക ചാക്കിലാക്കി ബൈക്കിൽ വേഗത്തിൽ കടന്നുകളയാൻ ശ്രമിക്കുന്നതിനിടെ, അപ്രതീക്ഷിതമായി ബൈക്കിലിരുന്ന ചാക്ക് പൊട്ടുകയും അടക്ക മുഴുവൻ റോഡിൽ ചിതറി വീഴുകയും ചെയ്തു.

ALSO READ: സോഷ്യൽ മീഡിയയിലെ 'വിചാരണ': യുവാവിൻ്റെ ആത്മഹത്യയിൽ യുവതിക്കെതിരെ ഗുരുതര ആരോപണങ്ങൾ; ഡി.ജി.പിക്ക് പരാതി നൽകി രാഹുൽ ഈശ്വർ

റോഡിൽ വീണ അടക്ക പെറുക്കിയെടുക്കാൻ യുവാക്കൾ കാണിച്ച വെപ്രാളവും പെരുമാറ്റവും ശ്രദ്ധയിൽപ്പെട്ട നാട്ടുകാർക്ക് സംശയം തോന്നി. തുടർന്ന് നാട്ടുകാർ ഇവരെ തടഞ്ഞുവെച്ച് മാവൂർ പൊലിസിൽ വിവരം അറിയിക്കുകയായിരുന്നു. പൊലിസ് സ്ഥലത്തെത്തി നടത്തിയ ചോദ്യം ചെയ്യലിൽ മോഷണവിവരം പുറത്തുവന്നു. പ്രതികൾ സഞ്ചരിച്ച ബൈക്കും പൊലിസ് കസ്റ്റഡിയിലെടുത്തു.

പിടിയിലായവർ മുൻപും സമാനമായ രീതിയിൽ കാർഷിക ഉൽപ്പന്നങ്ങൾ മോഷ്ടിച്ചിട്ടുള്ളവരാണെന്ന് പൊലിസ് പറഞ്ഞു. സമീപപ്രദേശങ്ങളിൽ നടന്ന കൊപ്ര മോഷണ കേസുകളിലും ഇവർക്ക് പങ്കുള്ളതായി പ്രാഥമിക അന്വേഷണത്തിൽ വ്യക്തമായിട്ടുണ്ട്. സംഘം കൂടുതൽ മോഷണങ്ങൾ നടത്തിയിട്ടുണ്ടോ എന്നറിയാൻ വിശദമായ ചോദ്യം ചെയ്യൽ തുടരുകയാണ്.

Three youths were arrested in Mavoor, Kozhikode, for stealing areca nuts that were set out to dry in a house courtyard. The theft came to light when the sack carrying the stolen nuts accidentally tore and spilled across the road while the trio was escaping on a bike. Suspicious of their behavior, local residents detained them and alerted the police. Investigations revealed that the suspects, identified as Vishakh, Ajay, and Rohit, were also involved in previous copra (dried coconut) thefts in the area.