ഇന്ത്യൻ ഓപ്പണർ അഭിഷേക് ശർമയെ പ്രശംസിച്ച് മുൻ ഇന്ത്യൻ സ്പിന്നർ ഹർഭജൻ സിങ്. ക്രിസ് ഗെയ്ൽ ഗ്ലെൻ മാക്‌സ്‌വെൽ തുടങ്ങിയ വെടിക്കെട്ട് താരങ്ങളുമായി അഭിഷേകിനെ താരതമ്യം ചെയ്തുകൊണ്ടാണ് ഹർഭജൻ സംസാരിച്ചത്. സിക്‌സറുകൾ നേടാനുള്ള അഭിഷേകിന്റെ കഴിവിനെയും ഹർഭജൻ പ്രശംസിച്ചു. 

''അഭിഷേക് ശർമ്മ ചെയ്യുന്നത് വളരെ വലിയ കാര്യമാണ്. ഓസ്‌ട്രേലിയക്കായി മാക്‌സ്‌വെൽ ഒരുപാട് കാര്യങ്ങൾ ചെയ്തിട്ടുണ്ട്. ധാരാളം സിക്‌സറുകൾ നേടി. ക്രിസ് ഗെയ്ൽ ഒരു വലിയ പേരാണ്. അദ്ദേഹം എളുപ്പത്തിൽ സിക്‌സറുകൾ അടിക്കുന്നുണ്ട്. ഇവരെല്ലാം അവരുടെ ശക്തികൊണ്ടാണ് സിക്സുകൾ നേടുന്നത്. അഭിഷേകിന് ഒരുപാട് സമയവും കരുത്തുമുണ്ട്. വളരെ ചെറുപ്പം മുതലേ അവൻ ചെയ്യുന്ന കാര്യങ്ങൾ ഈ ആളുകൾ നേടിയത് പോലെയാവും. അവർ കളിച്ച അത്ര മത്സരങ്ങൾ വരെ അവൻ കളിച്ചാൽ അവൻ ഗെയ്ൽ, മാക്‌സ്‌വെൽ എന്നിവരേക്കാൾ മുന്നിലെത്തും'' ഹർഭജൻ സിങ് പറഞ്ഞു. 

റായ്പൂരിൽ നടന്ന ന്യൂസിലാൻഡിനെതിരെയുള്ള ആദ്യ ടി-20യിൽ 35 പന്തിൽ 84 റൺസ് നേടിയാണ് അഭിഷേക് തിളങ്ങിയത്. അഞ്ചു ഫോറുകളും എട്ട് സിക്സുകളും അടങ്ങുന്നതാണ് താരത്തിന്റെ വെടിക്കെട്ട് ഇന്നിംഗ്സ്. മത്സരത്തിലെ ഈ വെടിക്കെട്ട് ഇന്നിങ്സിന് പിന്നാലെ ടി-20യിൽ 5000 റൺസ് പൂർത്തിയാക്കാനും അഭിഷേക് ശർമയ്ക്ക് സാധിച്ചു.

കുട്ടിക്രിക്കറ്റിൽ ഏറ്റവും മികച്ച സ്ട്രൈക്ക് റേറ്റിൽ 5000 റൺസ് നേടുന്ന താരമായും അഭിഷേക് ശർമ്മ മാറി. 172.48 പ്രഹരശേഷിയിലാണ് താരം ഈ നേട്ടം കൈവരിച്ചത്. 167.61 സ്ട്രൈക്ക് റേറ്റിൽ 5000 റൺസ് നേടിയ വെസ്റ്റ് ഇൻഡീസ് ഇതിഹാസം ആന്ദ്രേ റസലിനെ മറികടന്നാണ് അഭിഷേക് ശർമ്മയുടെ ഈ നേട്ടം. 

ഇതിന് പുറമെ മറ്റൊരു റെക്കോർഡും അഭിഷേക് കൈവരിച്ചു. ടി-20യിൽ ഏറ്റവും കൂടുതൽ ഇന്നിങ്‌സുകളിൽ എട്ടോ അതിലധികമോ സിക്സുകൾ നേടിയ ഇന്ത്യൻ താരങ്ങളുടെ പട്ടികയിൽ ഒന്നാം സ്ഥാനത്തെത്താനും അഭിഷേകിന് സാധിച്ചു. ഇത് നാലാം തവണയാണ് അഭിഷേക് ഒരു ഇന്നിങ്സിൽ ഇത്രയധികം സിക്സുകൾ നേടുന്നത്. മൂന്ന് ഇന്നിങ്‌സുകളിൽ നിന്നും എട്ടിലധികം സിക്സുകൾ സ്വന്തമാക്കിയ രോഹിത് ശർമ്മ, സഞ്ജു സാംസൺ എന്നിവരെ മറികടന്നാണ് അഭിഷേക് ഒന്നാം സ്ഥാനത്തേക്ക് കുതിച്ചത്. 

Former Indian spinner Harbhajan Singh has heaped praise on Indian opener Abhishek Sharma. Harbhajan spoke by comparing Abhishek with firepower players like Chris Gayle and Glenn Maxwell. Harbhajan also praised Abhishek's ability to hit sixes.