കോഴിക്കോട്: നിയമസഭ തെരഞ്ഞെടുപ്പില്‍ ബേപ്പൂര്‍ മണ്ഡലത്തില്‍ പി.വി അന്‍വര്‍ തന്നെ സ്ഥാനാര്‍ത്ഥിയാകുമെന്ന് സ്ഥിരീകരിച്ച് കെ.പി.സി.സി പ്രസിഡന്റ് സണ്ണി ജോസഫ്. ബേപ്പൂരില്‍ അന്‍വര്‍ തന്നെ ജയിക്കുമെന്നും അദ്ദേഹം പറഞ്ഞു. ബേപ്പൂരില്‍ പി.വി അന്‍വര്‍ പ്രചാരണം തുടങ്ങിയതിനെ കുറിച്ചുള്ള മാധ്യമപ്രവര്‍ത്തകരുടെ ചോദ്യത്തിനായിരുന്നു സണ്ണി ജോസഫിന്റെ പ്രതികരണം.

യു.ഡി.എഫിലെ സീറ്റ് വിഭജനത്തിനും സ്ഥാനാര്‍ഥി നിര്‍ണയത്തിനും അന്തിമ തീരുമാനമാകുന്നതിന് മുമ്പേതന്നെ ബേപ്പൂര്‍ നിയോജകമണ്ഡലത്തില്‍ അന്‍വര്‍ അനൗദ്യോഗികമായി പ്രചാരണം തുടങ്ങിയിരുന്നു. മുസ്‌ലിം ലീഗ് സംസ്ഥാന വൈസ് പ്രസിഡന്റ് എം.സി മായിന്‍ഹാജി ഉള്‍പ്പെടെ മണ്ഡലത്തിലെ പ്രമുഖരെ അന്‍വര്‍ നേരിട്ട് കണ്ട് പിന്തുണ തേടിയിരുന്നു. 

ALSO READ: അനധികൃത പരോള്‍: അടിയന്തര പ്രമേയത്തിന് അനുമതിയില്ല, സഭ ബഹിഷ്‌കരിച്ച് പ്രതിപക്ഷം

ബേപ്പൂരില്‍ മന്ത്രി പി.എ മുഹമ്മദ് റിയാസിനെ നേരിടാന്‍ അന്‍വറിനെ ഇറക്കാന്‍ യു.ഡി.എഫില്‍ പ്രാഥമിക ധാരണയായിരുന്നു. കോണ്‍ഗ്രസ് മത്സരിച്ചുപോരുന്ന ബേപ്പൂര്‍ അന്‍വറിന് വിട്ടുനല്‍കുന്നതില്‍ യു.ഡി.എഫില്‍ കാര്യമായ എതിര്‍പ്പില്ല. അന്‍വറിലൂടെ ശക്തമായ മത്സരം കാഴ്ചവയ്ക്കാമെന്നാണ് യു.ഡി.എഫ് കണക്കുകൂട്ടല്‍. ഇതിന്റെ അടിസ്ഥാനത്തിലാണ് അന്‍വര്‍ അനൗദ്യോഗിക പ്രചാരണം തുടങ്ങിയത്. 

ബേപ്പൂര്‍ മണ്ഡലത്തിലെ പ്രമുഖരുമായി അന്‍വര്‍ കൂടിക്കാഴ്ച നടത്തി. സാമൂഹിക വ്യാപാര രംഗത്തെ പ്രമുഖരുമായും മത, സാമുദായിക നേതാക്കളുമായും അന്‍വര്‍ കൂടിക്കാഴ്ച നടത്തുന്നുണ്ട്. കഴിഞ്ഞ നിയമസഭാ തെരഞ്ഞെടുപ്പില്‍ 28,747 വോട്ടിന്റെ ഭൂരിപക്ഷത്തിനാണ് മുഹമ്മദ് റിയാസ് വിജയിച്ചത്. എന്നാല്‍ ലോക്സഭാ തെരഞ്ഞെടുപ്പിലും തദ്ദേശ തെരഞ്ഞെടുപ്പിലും യു.ഡി.എഫിന് നേട്ടമുണ്ടാക്കാനായി.

ALSO READ: സി.ജെ റോയിയുടെ മരണത്തില്‍ ജുഡീഷ്യല്‍ അന്വേഷണം വേണം; ധനമന്ത്രിക്ക് കത്തയച്ച് മുഖ്യമന്ത്രി പിണറായി വിജയന്‍

കഴിഞ്ഞ ഡിസംബറിലാണ് അന്‍വറിന്റെ തൃണമൂല്‍ കോണ്‍ഗ്രസിനെ യു.ഡി.എഫിലെ അസോസിയേറ്റ് അംഗമാക്കിയത്. മൂന്ന് സീറ്റുകളിലാണ് അന്‍വര്‍ യു.ഡി.എഫിനോട് ആവശ്യപ്പെട്ടിട്ടുള്ളത്. സജി മഞ്ഞക്കടമ്പന് വേണ്ടി പൂഞ്ഞാറും നിസാര്‍ മേത്തറിന് വേണ്ടി തൃക്കരിപ്പൂരുമാണ് ചോദിച്ചത്. ഇക്കാര്യത്തില്‍ യു.ഡി.എഫ് ഉറപ്പൊന്നും നല്‍കിയിട്ടില്ല.

KPCC President Sunny Joseph has confirmed that P.V. Anvar will be the candidate from the Beypore Assembly constituency in the upcoming Kerala Assembly elections. He expressed confidence that Anvar would secure a victory from the constituency.