മസ്‌കത്ത്: ഒമാനിലെത്തുന്ന വിദേശ വിനോദസഞ്ചാരികള്‍ക്ക് ഷോപ്പിങ്ങില്‍ അടച്ച വാറ്റ് തിരികെ ലഭ്യമാക്കുന്ന പുതിയ പദ്ധതി ഒമാന്‍ നികുതി അതോറിറ്റി പ്രഖ്യാപിച്ചു. ടൂറിസം മേഖലയെ കൂടുതല്‍ ആകര്‍ഷകമാക്കുന്നതിന്റെയും സന്ദര്‍ശകരുടെ ഷോപ്പിങ് അനുഭവം മെച്ചപ്പെടുത്തുന്നതിന്റെയും ഭാഗമായാണ് നടപടി.

പദ്ധതി നടപ്പാക്കുന്നതിനായി ആവശ്യമായ സേവന ഏജന്‍സികളുമായി കരാര്‍ ഒപ്പുവച്ചതായി നികുതി അതോറിറ്റി അറിയിച്ചു. വാറ്റ് റീഫണ്ട് സംവിധാനം പ്രാബല്യത്തില്‍ വരുന്നതോടെ, യോഗ്യരായ വിനോദസഞ്ചാരികള്‍ക്ക് ഒമാനില്‍ വാങ്ങുന്ന ചില സാധനങ്ങള്‍ക്ക് അടച്ച നികുതി രാജ്യത്ത് നിന്ന് മടങ്ങുമ്പോള്‍ തിരികെ ലഭിക്കും.

നിലവില്‍ 5 ശതമാനമാണ് ഒമാനില്‍ വാറ്റ് നിരക്ക്. ഈ തുകയില്‍ ഒരു ഭാഗം തിരികെ ലഭിക്കുന്നതോടെ രാജ്യത്തെ റീട്ടെയില്‍ മേഖലയ്ക്കും ടൂറിസം വ്യവസായത്തിനും കൂടുതല്‍ വളര്‍ച്ച ഉണ്ടാകുമെന്നാണ് വിലയിരുത്തല്‍.

പദ്ധതിയുടെ വിശദമായ മാര്‍ഗനിര്‍ദേശങ്ങളും യോഗ്യതാ വ്യവസ്ഥകളും ഉടന്‍ പ്രഖ്യാപിക്കുമെന്ന് നികുതി അതോറിറ്റി വ്യക്തമാക്കി. അന്താരാഷ്ട്ര നിലവാരത്തിലുള്ള ടൂറിസ്റ്റ് സൗഹൃദ നികുതി സംവിധാനങ്ങളോട് ഒമാനെ കൂടുതല്‍ ചേര്‍ത്തുനിര്‍ത്തുന്നതിനുള്ള നീക്കത്തിന്റെ ഭാഗമായാണ് പുതിയ വാറ്റ് റീഫണ്ട് പദ്ധതി.

Oman Tax Authority has announced a new VAT refund scheme for tourists, allowing eligible visitors to claim back VAT on purchases, boosting tourism and retail sectors.