മസ്‌കത്ത്: ഒമാന്റെ ദേശീയ വിമാനക്കമ്പനിയായ ഒമാന്‍ എയര്‍ അന്താരാഷ്ട്ര യാത്രക്കാര്‍ക്കായി പ്രത്യേക ഗ്ലോബല്‍ സെയില്‍ പ്രഖ്യാപിച്ചു. ഈ ഓഫറിലൂടെ ഇക്കണോമി ക്ലാസ്, ബിസിനസ് ക്ലാസ് ടിക്കറ്റുകള്‍ക്ക് ഇളവോടെ ബുക്കിംഗ് നടത്താനാകും.

ഫെബ്രുവരി 3 മുതല്‍ 12 വരെ നടത്തുന്ന സെയില്‍ കാലയളവില്‍ ടിക്കറ്റുകള്‍ ബുക്ക് ചെയ്യുന്നവര്‍ക്ക്, ഏപ്രില്‍ 12 മുതല്‍ ജൂണ്‍ 24 വരെ യാത്ര ചെയ്യാനുള്ള ടിക്കറ്റുകള്‍ക്ക് ഇളവ് ലഭിക്കും. ഒരുവശത്തേക്കുള്ള യാത്രയ്ക്കും റിട്ടേണ്‍ ടിക്കറ്റുകള്‍ക്കും ഈ ഓഫര്‍ ബാധകമാണ്.

യൂറോപ്പ്, ഏഷ്യ, മിഡില്‍ ഈസ്റ്റ് എന്നിവിടങ്ങളിലേക്കുള്ള ഒമാന്‍ എയര്‍ സര്‍വീസുകളാണ് പ്രധാനമായും ഓഫറിന്റെ പരിധിയില്‍ ഉള്‍പ്പെടുന്നത്. ലണ്ടന്‍, പാരീസ്, ഫ്രാങ്ക്ഫര്‍ട്ട്, ഇസ്താംബുള്‍, ബാങ്കോക്ക്, ക്വാലാലംപൂര്‍, മനില, ദുബായ്, റിയാദ് തുടങ്ങിയ നഗരങ്ങളിലേക്കുള്ള യാത്രകള്‍ക്ക് കുറഞ്ഞ നിരക്കില്‍ ടിക്കറ്റ് ലഭിക്കും. സീറ്റുകളുടെ ലഭ്യത അനുസരിച്ചായിരിക്കും ഇളവ് ബാധകമാകുക.

ALSO READ: ടൂറിസ്റ്റുകള്‍ക്ക് വാറ്റ് റീഫണ്ട് പദ്ധതി പ്രഖ്യാപിച്ച് ഒമാന്‍ നികുതി അതോറിറ്റി

ഒമാന്‍ എയറിന്റെ ഔദ്യോഗിക വെബ്‌സൈറ്റ് വഴിയും മൊബൈല്‍ ആപ്പ് വഴിയും നേരിട്ട് ടിക്കറ്റുകള്‍ ബുക്ക് ചെയ്യാം. കോഡ്‌ഷെയര്‍ സര്‍വീസുകള്‍ക്കും ചില പ്രത്യേക ഫ്‌ളൈറ്റുകള്‍ക്കും ഈ ഓഫര്‍ ബാധകമല്ലെന്നും കമ്പനി അറിയിച്ചു.

Oman Air has announced a global ticket sale offering discounted fares on economy and business class flights across key international destinations for a limited period.