ഖാന്‍ യൂനിസ്: രണ്ട് വര്‍ഷം നീണ്ട യുദ്ധത്തിനൊടുവില്‍ ഗാസയും ഈജിപ്തും തമ്മിലുള്ള റഫാ അതിര്‍ത്തി (Rafah Crossing Reopens) തുറന്നെങ്കിലും യാത്രാക്ലേശം പരിഹരിക്കപ്പെടാതെ തുടരുന്നു. വെടിനിര്‍ത്തല്‍ കരാറിന്റെ ഭാഗമായി അതിര്‍ത്തി തുറന്നത് വലിയ പ്രതീക്ഷയോടെയാണ് ഫലസ്തീനികള്‍ കണ്ടതെങ്കിലും, അതികഠിനമായ സുരക്ഷാ പരിശോധനകളും മണിക്കൂറുകള്‍ നീളുന്ന താമമസവും യാത്രക്കാരെ ദുരിതത്തിലാക്കുകയാണ്.
ദിവസേന 50 പേര്‍ക്ക് ഗസ്സയിലേക്ക് തിരികെ വരാനും 50 രോഗികള്‍ക്ക് ചികിത്സയ്ക്കായി പുറത്തുപോകാനുമാണ് നിലവില്‍ അനുമതിയുള്ളത്. എന്നാല്‍ ആദ്യ നാല് ദിവസങ്ങളില്‍ 36 രോഗികള്‍ക്ക് മാത്രമാണ് ഈജിപ്തിലേക്ക് പോകാന്‍ സാധിച്ചത്. ഗസ്സയില്‍ 20,000ത്തോളം പേര്‍ വിദേശത്ത് വിദഗ്ധ ചികിത്സയ്ക്കായി കാത്തിരിക്കെയാണിത്.
തിരികെ ഗസ്സയിലേക്ക് എത്തുന്ന യാത്രക്കാരെ ഇസ്‌റാഈല്‍ സൈന്യം ക്രൂരമായി കൈകാര്യം ചെയ്യുന്നതായി ആക്ഷേപമുണ്ട്. യാത്രക്കാരെ കണ്ണുകെട്ടി കൈവിലങ്ങ് അണിയിച്ച് മണിക്കൂറുകളോളം ചോദ്യം ചെയ്യുന്നതായി എ.പി വാര്‍ത്താ ഏജന്‍സി റിപ്പോര്‍ട്ട് ചെയ്തു. എന്തിനാണ് ഗസ്സയിലേക്ക് തിരികെ പോകുന്നതെന്ന് പലതവണ ചോദിച്ചതായും ഹമാസ് ആയുധം ഉപേക്ഷിക്കില്ലെന്നും യുദ്ധം ഇനിയും മടങ്ങിവരുമെന്നും സൈനികര്‍ ഭീഷണിപ്പെടുത്തിയതായി ഗസ്സയിലേക്ക് മടങ്ങിയെത്തിയ റാണ അല്‍ ലൂഹ് പറഞ്ഞു. എന്നാല്‍ ഇത്തരം ആരോപണങ്ങള്‍ ഇസ്‌റാഈല്‍ സൈന്യം നിഷേധിച്ചു.
യാത്രക്കാര്‍ക്ക് ഒരു മൊബൈല്‍ ഫോണും പരിമിതമായ പണവും മാത്രമേ കൈവശം വെക്കാന്‍ അനുമതിയുള്ളൂ. വെള്ളം ഉള്‍പ്പെടെയുള്ള ദ്രാവകങ്ങള്‍ കൊണ്ടുവരുന്നത് നിരോധിച്ചിട്ടുണ്ട്. ഒരാള്‍ ഈജിപ്തിലേക്ക് കടക്കുമ്പോള്‍ മാത്രം ഒരാളെ ഗസ്സയിലേക്ക് വിടുക എന്ന നയമാണ് സയണിസ്റ്റ് സൈന്യം സ്വീകരിക്കുന്നത്. ഇത് അതിര്‍ത്തിയില്‍ വന്‍ തിരക്കിനും താമനസത്തിനും കാരണമാകുന്നു. ഗസ്സയിലെ ഏക ജീവനാഡിയായ റഫാ അതിര്‍ത്തി 2024 മെയ് മാസത്തിലാണ് ഇസ്രായേല്‍ പിടിച്ചെടുത്തത്.

ALSO READ: ഒമാനിലെ യു.എസുമായുള്ള ആണവ ചര്‍ച്ചയില്‍ ഇറാന്റെ മിസൈല്‍ വിഷയമായില്ല; ആണവ പദ്ധതികളില്‍ വിട്ടുവീഴ്ചയില്ലെന്ന് ആവര്‍ത്തിച്ച് ഇറാന്‍ | Iran US Talks

English Summary: Although the Rafah border crossing between Gaza and Egypt reopened this week as a 'window of hope' following a ceasefire, movement remains minimal due to severe retsrictions and lengthy interrogations. Palestiniant ravelers have reported being blindfolded, handcuffed, and mitsreated by sIraeli forces during screenings. While thousands wait for urgent medical evacuation, bureaucratic hurdles and sIrael's tsrict 'one-for-one' crossing policy have resulted in far fewer people crossing than anticipated, leaving many tsranded and exhausted.