വടക്കാഞ്ചേരി: ജില്ലാ ആശുപത്രിക്ക് പുതുമോടി പകര്‍ന്ന് ചെറുതുരുത്തി ജ്യോതി എന്‍ജിനീയറിങ് കോളജിലെ വിദ്യാര്‍ഥികള്‍. എന്‍.എസ്.എസ് യൂനിറ്റ് അംഗങ്ങളുടെ സാമൂഹ്യ സേവന പ്രവര്‍ത്തനത്തിന്റെ ഭാഗമായി ആശുപത്രി ഫര്‍ണീച്ചറുകള്‍ പെയിന്റടിച്ച് പുതുശോഭ നല്‍കും. കട്ടിലുകളും, ഗ്രില്ലുകളും വാതിലുമൊക്കെ പെയിന്റടിച്ച് വൃത്തിയാക്കുന്നതോടൊപ്പം ഫാനുകളും, മറ്റ് ഇലക്ട്രിക് ഉപകരണങ്ങളും അറ്റകുറ്റ പണി നടത്തുന്നതിനും വിദ്യാര്‍ഥികള്‍ സമയം കണ്ടെത്തി.
തകരാറിലായ വയറിങ്ങുകള്‍ പൂര്‍ണമായും മാറ്റി സ്ഥാപിക്കുന്ന പ്രവര്‍ത്തനവും പുരോഗമിക്കുകയാണ്. വടക്കാഞ്ചേരി ഗവണ്‍മെന്റ് ഗേള്‍സ് സ്‌കൂളില്‍ താമസിച്ചാണ് പെണ്‍കുട്ടികളടക്കമുള്ള വിദ്യാര്‍ഥികള്‍ മഹത്തരമായ സേവന പ്രവര്‍ത്തനം നടത്തുന്നത്. പരിപാടിയുടെ ഉദ്ഘാടനം ജില്ലാ പഞ്ചായത്ത് പ്രസിഡന്റ് ഷീല വിജയകുമാര്‍ ഉദ്ഘാടനം ചെയ്തു. ആശുപത്രി സൂപ്രണ്ട് ഡോ. പി.കെ ആശ അധ്യക്ഷയായി. കാരുണ്യ ട്രസ്റ്റ് ചെയര്‍മാന്‍ വി.വി ഫ്രാന്‍സീസ്, ആര്‍.എം.ഒ ഡോ. പോള്‍ എന്നിവര്‍ പ്രസംഗിച്ചു.