ടി-20 ലോകകപ്പിലെ ആദ്യ മത്സരത്തിൽ അമേരിക്കയെ 29 റൺസിന് വീഴ്ത്തി ഇന്ത്യ തുടക്കം ഗംഭീരമായിരിക്കുകയാണ്. മുംബൈ വാങ്കഡെ സ്റ്റേഡിയത്തിൽ നടന്ന മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഇന്ത്യ 20 ഓവറിൽ 9 വിക്കറ്റ് നഷ്ടത്തിൽ 161 റൺസെടുത്തപ്പോൾ, അമേരിക്കയുടെ മറുപടി 132 റൺസിൽ അവസാനിച്ചു.

മത്സരത്തിൽ ഇന്ത്യൻ ക്യാപ്റ്റൻ സൂര്യകുമാർ യാദവ് മിന്നും പ്രകടനമാണ് നടത്തിയത്. മത്സരത്തിൽ സ്‌കൈ 49 പന്തിൽ പുറത്താവാതെ 84 റൺസ് നേടിയാണ് തിളങ്ങിയത്. 10 ഫോറുകളും നാല് സിക്സുകളും അടങ്ങുന്നതാണ് ഇന്ത്യൻ ക്യാപ്റ്റന്റെ ഇന്നിംഗ്സ്.

ഇപ്പോൾ ഇന്ത്യൻ ടീമിന്റെ ലോകകപ്പിലെ പ്രകടനങ്ങളെയും ക്യാപ്റ്റൻ സൂര്യകുമാർ യാദവിനെയും പ്രശംസിച്ചിരിക്കുകയാണ് മുൻ ഇന്ത്യൻ നായകൻ സൗരവ് ഗാംഗുലി. ഇന്ത്യ ലോകകപ്പ് ചാമ്പ്യന്മാരാവുമെന്നും സൂര്യകുമാർ യാദവ് ടി-20 ഫോർമാറ്റിലെ ഒരു ചാമ്പ്യൻ താരമാണെന്നും ഗാംഗുലി പറഞ്ഞു. 

''ബൗളിങ്, ബാറ്റിങ്, ഫീൽഡിങ് തുടങ്ങിയ എല്ലാ മേഖലയിലും വളരെ ബാലൻസായുള്ള ശക്തമായ ടീമാണ് ഇന്ത്യ. 2026 ഐസിസി ടി-20 ലോകകപ്പ് നേടാൻ ഏറ്റവും കൂടുതൽ സാധ്യത ഇന്ത്യക്കാണ്. ഒരുപാട് റൺസ് നേടിയാണ് സൂര്യകുമാർ യാദവ് ടൂർണമെന്റിലേക്ക് എത്തിയത്. അദ്ദേഹം ടി-20 ഫോർമാറ്റിലെ ഒരു ചാമ്പ്യൻ താരമാണ്'' സൗരവ് ഗാംഗുലി പറഞ്ഞു. 

മത്സരത്തിലെ പ്ലയെർ ഓഫ് ദി മാച്ച് അവാർഡ് സ്വന്തമാക്കിയതും സ്‌കൈ തന്നെയാണ്. ഇതോടെ ടി-20യിൽ ഇന്ത്യക്കായി ഏറ്റവും കൂടുതൽ തവണ പ്ലയെർ ഓഫ് ദി മാച്ച് അവാർഡ് സ്വന്തമാക്കുന്ന താരമായും സൂര്യകുമാർ മാറി. 17ാം തവണയാണ് സ്‌കൈയെ തേടി ഈ നേട്ടമെത്തിയത്. 16 തവണ ഇന്റർനാഷണൽ ടി-20യിൽ പ്ലയെർ ഓഫ് ദി മാച്ച് അവാർഡ് നേടിയ വിരാട് കോഹ്‌ലിയെ മറികടന്നാണ് സൂര്യ ഒന്നാമനായത്. 

Former Indian captain Sourav Ganguly has praised the Indian team's performance in the World Cup and captain Suryakumar Yadav. Ganguly said that India will be the World Cup champions and Suryakumar Yadav is a champion player in the T20 format.