മസ്‌കത്ത്: മലിനീകരണമില്ലാത്ത ഊര്‍ജ സ്രോതസുകള്‍ കൂടുതല്‍ പ്രയോജനപ്പെടുത്തുന്നതിന്റെ ഭാഗമായി ഹൈഡ്രജന്‍ ഉപയോഗിച്ച് വൈദ്യുതി ഉല്‍പാദിപ്പിക്കുന്ന പദ്ധതികള്‍ ഒമാന്‍ പരിഗണിക്കുന്നു. രാജ്യത്തിന്റെ ദീര്‍ഘകാല ഊര്‍ജ പരിവര്‍ത്തന നയങ്ങളുടെ ഭാഗമായാണ് ഹൈഡ്രജന്‍ അധിഷ്ഠിത വൈദ്യുതി ഉല്‍പാദന സംവിധാനങ്ങള്‍ ആവിഷ്‌കരിക്കാന്‍ സര്‍ക്കാര്‍ നീക്കം.

വൈദ്യുതിജല മേഖലകളില്‍ പുതിയ സാങ്കേതികവിദ്യകള്‍ ഉള്‍പ്പെടുത്തുന്നതിനുള്ള നടപടികള്‍ പുരോഗമിക്കുകയാണ്. ഇതിന്റെ ഭാഗമായി മലിനീകരണമില്ലാത്ത ഊര്‍ജ സ്രോതസായി ഹൈഡ്രജന്റെ സാധ്യതകള്‍ വിശദമായി പഠിച്ചുവരികയാണെന്ന് പബ്ലിക് സര്‍വീസസ് റെഗുലേറ്ററി അതോറിറ്റി അറിയിച്ചു.

സോളാര്‍, കാറ്റ് തുടങ്ങിയ പുതുക്കാവുന്ന ഊര്‍ജ സ്രോതസുകളില്‍ നിന്ന് ഉല്‍പാദിപ്പിക്കുന്ന ഗ്രീന്‍ ഹൈഡ്രജന്‍ വൈദ്യുതി ഉല്‍പാദനത്തിനും വ്യവസായ ആവശ്യങ്ങള്‍ക്കുമായി ഉപയോഗിക്കാനാണ് ലക്ഷ്യമിടുന്നത്. ഇതുവഴി കാര്‍ബണ്‍ ഉത്‌സര്‍ജനം കുറയ്ക്കാനും പരിസ്ഥിതി സംരക്ഷണത്തിനൊപ്പം ദീര്‍ഘകാല ഊര്‍ജ സുരക്ഷ ഉറപ്പാക്കാനും സാധിക്കുമെന്നാണ് വിലയിരുത്തല്‍.

ഹൈഡ്രജന്‍ ഉല്‍പാദനം, സംഭരണം, ഗതാഗതം എന്നിവയ്ക്കായി ആവശ്യമായ അടിസ്ഥാന സൗകര്യങ്ങള്‍ വികസിപ്പിക്കുന്നതും ഒമാന്‍ സര്‍ക്കാരിന്റെ പദ്ധതികളില്‍ ഉള്‍പ്പെടുന്നു. വ്യവസായ മേഖലകളെയും കയറ്റുമതി കേന്ദ്രങ്ങളെയും ബന്ധിപ്പിക്കുന്ന സംവിധാനങ്ങള്‍ രൂപപ്പെടുത്തുന്നതും ഇതിന്റെ ഭാഗമായാണ് പരിഗണിക്കുന്നത്.

വിഷന്‍ 2040 ലക്ഷ്യങ്ങളുടെ ഭാഗമായി മലിനീകരണമില്ലാത്ത ഊര്‍ജ മേഖലയില്‍ നിക്ഷേപങ്ങള്‍ വര്‍ധിപ്പിക്കാനാണ് ഒമാന്റെ തീരുമാനം. ഹൈഡ്രജന്‍ ഉപയോഗിച്ചുള്ള വൈദ്യുതി ഉല്‍പാദനം പ്രാവര്‍ത്തികമാകുന്നതോടെ, മലിനീകരണമില്ലാത്ത ഊര്‍ജ രംഗത്ത് ഒമാന്‍ ഒരു പ്രധാന കേന്ദ്രമായി മാറുമെന്നാണ് പ്രതീക്ഷ.

Oman is planning to generate electricity using hydrogen as part of its energy transition strategy, aiming to boost pollution-free energy and strengthen long-term energy security.