കൊച്ചി: പത്തു വയസുകാരിയെ പീഡിപ്പിച്ച കേസിലെ പ്രതി പൊന്നാനി സ്വദേശി ഷംസുദ്ദീന് (41) ഹൈക്കോടതി സോപാധിക ജാമ്യം അനുവദിച്ചു. പെണ്‍കുട്ടിയുടെ പരാതിയെത്തുടര്‍ന്ന് ജൂണ്‍ പത്തിനാണ് പൊലിസ് ഇയാളെ അറസ്റ്റ് ചെയ്തത്. പോലിസ് കുറ്റപത്രം സമര്‍പ്പിച്ച കേസില്‍ ഓഗസ്റ്റ് നാലിന് വിചാരണക്കോടതി ജാമ്യാപേക്ഷ തള്ളിയിരുന്നു.
തുടര്‍ന്നാണ് പ്രതി ഹൈക്കോടതിയെ സമീപിച്ചത്. ജൂണ്‍ പത്തു മുതല്‍ പ്രതി കസ്റ്റഡിയില്‍ കഴിയുകയാണെന്നതും കേസില്‍ കുറ്റപത്രം സമര്‍പ്പിച്ചുവെന്നതും കണക്കിലെടുത്താണ് സിംഗിള്‍ബെഞ്ച് ജാമ്യം അനുവദിച്ചത്. ഒരു ലക്ഷം രൂപയുടെ രണ്ട് ആള്‍ജാമ്യമാണ് പ്രധാന വ്യവസ്ഥ. ഇതിലൊരാള്‍ പ്രതിയുടെ ഉറ്റബന്ധുവായിരിക്കണമെന്നും ഉത്തരവില്‍ പറയുന്നു.
കൂടാതെ പ്രതി 20,000 രൂപ കീഴ്‌ക്കോടതിയില്‍ സെക്യൂരിറ്റിയായി കെട്ടിവെക്കണം.