അബൂദബി: ഹബ്ഷാന്‍ ഗ്യാസ് പ്രോസസിംഗ് പ്ലാന്റിലുണ്ടായ തീപിടുത്തം നിയന്ത്രണവിധേയമാക്കിയതായി അബൂദബി അധികൃതര്‍ അറിയിച്ചു. അടിയന്തര വിഭാഗങ്ങള്‍ സ്ഥലത്തെത്തി തീയണയ്ക്കാനുള്ള നടപടികള്‍ സ്വീകരിച്ചതായും പ്ലാന്റിലെ ജീവനക്കാരുടെയും പരിസരവാസികളുടെയും സുരക്ഷ ഉറപ്പാക്കിയതായും ഔദ്യോഗിക വൃത്തങ്ങള്‍ വ്യക്തമാക്കി.
സംഭവത്തെക്കുറിച്ച് കൂടുതല്‍ വിവരങ്ങള്‍ ലഭ്യമാകുന്ന മുറയ്ക്ക് പുറത്തുവിടുമെന്നും അധികൃതര്‍ അറിയിച്ചു. സാഹചര്യം സൂക്ഷ്മമായി നിരീക്ഷിച്ചു വരികയാണെന്നും പൊതുജനങ്ങള്‍ പരിഭ്രാന്തരാകേണ്ടതില്ലെന്നും നിര്‍ദ്ദേശമുണ്ട്.
രാജ്യത്തിന്റെ വിവിധ ഭാഗങ്ങളിലായി മിസൈല്‍, ഡ്രോണ്‍ ഭീഷണികള്‍ യുഎഇ എയര്‍ ഡിഫന്‍സ് സിസ്റ്റം വിജയകരമായി തടഞ്ഞു. രാജ്യത്തിന്റെ വിവിധ ഭാഗങ്ങളില്‍ കേട്ട സ്‌ഫോടന ശബ്ദങ്ങള്‍ ഈ പ്രതിരോധ പ്രവര്‍ത്തനങ്ങളുടെ ഭാഗമാണെന്ന് പ്രതിരോധ മന്ത്രാലയം സ്ഥിരീകരിച്ചു.
നിലവില്‍ സ്ഥിതിഗതികള്‍ സുരക്ഷിതമാണെന്ന് അറിയിച്ച് താമസക്കാര്‍ക്ക് മൊബൈല്‍ സന്ദേശങ്ങള്‍ ലഭിച്ചിട്ടുണ്ട്. ഔദ്യോഗിക സ്രോതസ്സുകളില്‍ നിന്നുള്ള വിവരങ്ങള്‍ മാത്രം വിശ്വസിക്കുക. സമൂഹമാധ്യമങ്ങളിലൂടെ തെറ്റായ വാര്‍ത്തകളോ അഭ്യൂഹങ്ങളോ പ്രചരിപ്പിക്കരുതെന്ന് അധികൃതര്‍ കര്‍ശന നിര്‍ദ്ദേശം നല്‍കി.

Summary: Abu Dhabi authorities are currently responding to a fire at the Habshan gas-processing facility. Emergency teams have been deployed to contain the blaze and ensure the safety of personnel and nearby areas.