മനാമ: ഗള്‍ഫ് മേഖലയിലെ ചൂടേറിയ കാലാവസ്ഥയ്ക്കിടയില്‍ പുതിയ കായിക അനുഭവവുമായി ബഹ്‌റൈനില്‍ ആദ്യ ഇന്‍ഡോര്‍ സ്‌കി അക്കാദമി ആരംഭിക്കാനൊരുങ്ങുന്നു. രാജ്യത്തിന്റെ വിനോദ-കായിക മേഖലയില്‍ പുതിയ അധ്യായമായി വിലയിരുത്തപ്പെടുന്ന പദ്ധതി, കുട്ടികള്‍ക്കും യുവാക്കള്‍ക്കും അന്താരാഷ്ട്ര നിലവാരത്തിലുള്ള സ്‌കീയിംഗ് പരിശീലനം ലഭ്യമാക്കുക എന്ന ലക്ഷ്യത്തോടെയാണ് നടപ്പാക്കുന്നത്.

അന്താരാഷ്ട്ര സ്‌കീ പരിശീലന രംഗത്ത് പ്രവര്‍ത്തിക്കുന്ന പ്രമുഖ സ്ഥാപനത്തിന്റെ സഹകരണത്തോടെയായിരിക്കും അക്കാദമി പ്രവര്‍ത്തനം ആരംഭിക്കുക. വിനോദസഞ്ചാര മേഖലയെയും കായികരംഗത്തെയും ഒരുപോലെ ലക്ഷ്യമിടുന്ന പദ്ധതിയെന്ന നിലയിലാണ് പദ്ധതിയെ കാണുന്നത്. ഗള്‍ഫ് മേഖലയിലെ ജീവിതശൈലിയിലും വിനോദരംഗത്തും വലിയ മാറ്റങ്ങള്‍ സംഭവിക്കുന്ന സമയത്ത്, പരമ്പരാഗത വിനോദ മാര്‍ഗങ്ങള്‍ക്കപ്പുറം പുതിയ അനുഭവങ്ങള്‍ ഒരുക്കാനുള്ള ശ്രമമായും ഇത് ശ്രദ്ധ നേടുന്നു.

വര്‍ഷം മുഴുവന്‍ പ്രവര്‍ത്തിക്കുന്ന തരത്തില്‍ അത്യാധുനിക തണുപ്പിക്കല്‍ സംവിധാനങ്ങളോടെയാകും ഇന്‍ഡോര്‍ സ്‌കി കേന്ദ്രം സജ്ജമാക്കുക. പ്രകൃതിദത്ത മഞ്ഞിന്റെ അനുഭവം നല്‍കുന്ന പ്രത്യേക ട്രാക്കുകളും പരിശീലന മേഖലകളും സുരക്ഷാ സംവിധാനങ്ങളും ഉള്‍പ്പെടുന്ന രീതിയിലാണ് പദ്ധതിയുടെ രൂപകല്‍പ്പന. തുടക്കക്കാര്‍ക്കും പ്രൊഫഷണല്‍ പരിശീലനം ആഗ്രഹിക്കുന്നവര്‍ക്കും പ്രത്യേകം സംവിധാനങ്ങള്‍ ഒരുക്കുമെന്നും റിപ്പോര്‍ട്ടുകളുണ്ട്.

കുട്ടികളിലും യുവാക്കളിലും പുതിയ കായിക ഇനങ്ങളോടുള്ള താല്‍പര്യം വര്‍ധിപ്പിക്കുകയാണ് പദ്ധതിയുടെ പ്രധാന ലക്ഷ്യങ്ങളിലൊന്ന്. ശരീര ക്ഷമതയും ആത്മവിശ്വാസവും വളര്‍ത്താന്‍ സഹായിക്കുന്ന കായിക വിനോദമായി സ്‌കീയിംഗിനെ ജനകീയമാക്കാനാണ് അധികൃതരുടെ ശ്രമം. കുടുംബങ്ങള്‍ക്കും വിനോദ സഞ്ചാരികള്‍ക്കും ഒരുപോലെ ആകര്‍ഷകമായ കേന്ദ്രമായി ഇത് മാറുമെന്നാണ് പ്രതീക്ഷ.

ALSO READ: ദേശീയ സുരക്ഷയില്‍ വിട്ടുവീഴ്ചയില്ല; ശക്തമായ മുന്നറിയിപ്പുമായി ബഹ്‌റൈന്‍

ഗള്‍ഫ് രാജ്യങ്ങള്‍ വിനോദ-കായിക മേഖലകളില്‍ വന്‍ നിക്ഷേപങ്ങള്‍ നടത്തുന്ന സാഹചര്യത്തിലാണ് ബഹ്‌റൈനും പുതിയ പദ്ധതികളുമായി മുന്നോട്ട് പോകുന്നത്. ലോകോത്തര സൗകര്യങ്ങളുള്ള വിനോദകേന്ദ്രങ്ങള്‍, സ്‌പോര്‍ട്‌സ് അക്കാദമികള്‍, കുടുംബ വിനോദ പദ്ധതികള്‍ എന്നിവയിലൂടെ രാജ്യത്തെ ടൂറിസം മേഖല ശക്തിപ്പെടുത്താനാണ് നീക്കങ്ങള്‍.

ഇന്‍ഡോര്‍ സ്‌കി അക്കാദമി ആരംഭിക്കുന്നതോടെ ബഹ്‌റൈനിലെ കായിക-വിനോദ രംഗത്തിന് പുതിയ സാധ്യതകള്‍ തുറക്കുമെന്നാണ് പ്രതീക്ഷ. മഞ്ഞിന്റെ അനുഭവം നല്‍കുന്ന ഈ പദ്ധതി രാജ്യത്തെ ടൂറിസം മേഖലയ്ക്കും കൂടുതല്‍ ആകര്‍ഷണമാകും എന്നാണ് വിലയിരുത്തല്‍.

Bahrain is set to launch its first indoor ski academy, introducing winter sports training and creating new opportunities in the country’s sports and tourism sectors.