കോഴിക്കോട് ജില്ലയിലെ ചെറുവണ്ണൂര്‍ കക്കറമുക്കില്‍ ഓടിക്കൊണ്ടിരുന്ന കാറിന് തീപിടിച്ച് ഏഴ് മാസം ഗര്‍ഭിണിയായ യുവതി വെന്തുമരിച്ചു. കക്കറമുക്ക് സ്വദേശി രജിന്‍ ലാലിന്റെ ഭാര്യ പൂവത്തുംചാലില്‍ സോന (27) ആണ് മരിച്ചത്. ഗുരുതരമായി പൊള്ളലേറ്റ രജിന്‍ ലാല്‍ കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്.

വിവാഹം കഴിഞ്ഞ് മൂന്ന് വര്‍ഷങ്ങള്‍ക്കുശേഷം ജീവിതത്തിലേക്ക് ഒരു കുഞ്ഞ് വരാനിരിക്കുന്ന സന്തോഷത്തിലായിരുന്നു ദമ്പതികള്‍. വിദേശത്ത് ജോലി ചെയ്തിരുന്ന രജിന്‍ ലാല്‍ ഭാര്യയുടെ പ്രസവകാലത്ത് ഒപ്പമിരിക്കാനായി ഒരു മാസം മുന്‍പാണ് നാട്ടിലെത്തിയത്.

ALSO READ: എ.ഐ.എ.ഡി.എം.കെ വിമതരെ മന്ത്രിസഭയില്‍ ഉള്‍പ്പെടുത്തരുത്; വിജയ്ക്ക് മുന്നറിപ്പുമായി കോണ്‍ഗ്രസ് 

വെള്ളിയാഴ്ച രാത്രി സോനയുടെ സ്ഥിരം ആരോഗ്യ പരിശോധന കഴിഞ്ഞ് മടങ്ങുന്നതിനിടെയായിരുന്നു ദുരന്തം. യാത്രയ്ക്കിടെ കാറില്‍നിന്ന് പെട്ടെന്ന് തീയും പുകയും ഉയരുകയായിരുന്നു. ഉടന്‍ വാഹനം നിര്‍ത്തി രജിന്‍ പുറത്തേക്ക് ചാടിയെങ്കിലും ദേഹത്ത് തീപടര്‍ന്നു.

ഈ സമയത്ത് സോന കാറിന്റെ പിന്‍സീറ്റിലായിരുന്നു. സോനയെ പുറത്തെടുക്കാന്‍ രജിന്‍ ശ്രമിച്ചെങ്കിലും തീ ശക്തമായി പടരുകയായിരുന്നു. ദേഹത്ത് തീപിടിച്ചതിനെ തുടര്‍ന്ന് രജിന്‍ സമീപത്തെ തോട്ടിലേക്കു ചാടി രക്ഷപ്പെടാന്‍ ശ്രമിച്ചു. ഇതിനിടെ കാറിന്റെ ഡോര്‍ ലോക്കായതോടെ സോന വാഹനത്തിനുള്ളില്‍ കുടുങ്ങി.

സംഭവം ശ്രദ്ധയില്‍പ്പെട്ട നാട്ടുകാര്‍ സമീപത്തെ വയലില്‍നിന്ന് വെള്ളം കോരിയൊഴിച്ച് തീയണയ്ക്കാനും സോനയെ രക്ഷിക്കാനും ശ്രമിച്ചെങ്കിലും സാധിച്ചില്ല. പിന്നീട് പേരാമ്പ്രയില്‍നിന്ന് എത്തിയ അഗ്‌നിരക്ഷാസേന സോനയെ പുറത്തെടുത്ത് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

പാലേരി കുയിമ്പില്‍ കള്ളിക്കണ്ടി മീത്തല്‍ ശ്രീനിവാസന്‍-വസന്ത ദമ്പതികളുടെ മകളാണ് സോന. സഹോദരന്‍: സോനു.