ഗ്ലാസ്‌ഗോ: കോമണ്‍വെല്‍ത്ത് ഗെയിംസിന്റെ ആദ്യ ദിനത്തില്‍ ഇന്ത്യന്‍ പ്രതീക്ഷകള്‍ക്ക് വന്‍ തിരിച്ചടി. മത്സരത്തിനിറങ്ങും മുമ്പ് ഉത്തേജക വിവാദത്തില്‍ വീണിരിക്കുകയാണ് ഇന്ത്യന്‍ താരങ്ങള്‍. പ്രമുഖ ജൂഡോ താരം അരുണ്‍ കുമാര്‍ ടൂര്‍ണമെന്റില്‍ നിന്ന് പിന്മാറിയിരിക്കുകയാണ്. ടൂര്‍ണമെന്റിന് മുന്നോടിയായി നടത്തിയ ഉത്തേജക പരിശോധനയില്‍ താരം പരാജയപ്പെട്ടതായി അഡ്വേഴ്‌സ് അനലറ്റിക്കല്‍ ഫൈന്‍ഡിങ് അറിയിക്കുകയായിരുന്നു. പുരുഷ വിഭാഗം 73 കിലോ ജൂഡോ വിഭാഗത്തിലായിരുന്നു താരം പരിശോധിക്കേണ്ടത്. 
പരിശോധനയില്‍ പരാജയപ്പെട്ടതിനാല്‍ താരത്തിന് മത്സരിക്കുന്നതില്‍ അയോഗ്യത വന്ന സാഹചര്യത്തിലാണ് അരുണ്‍ കുമാറിന്റെ പിന്മാറ്റം.ഇതോടെ കോമണ്‍വെല്‍ത്ത് സ്‌പോര്‍ട്‌സ് എന്‍ട്രീസ് സിസ്റ്റത്തില്‍ നിന്ന് അരുണിന്റെ പേര് ഇന്ത്യ നീക്കം ചെയ്തു. ദേശീയ ഉത്തേജക വിരുദ്ധ ഏജന്‍സി അരുണിന് നോട്ടിസും നല്‍കിയിരുന്നു. അന്താരാഷ്ട്ര ജൂഡോ ഫെഡറേഷന്‍ സംഘാടകര്‍ക്ക് താരം ഉത്തേജക പരിശോധനയില്‍ പരാജയപ്പെട്ടതായും അറിയിച്ചിരുന്നു. ഇന്ത്യന്‍ ഒളിംപിക് അസോസിയേഷനും വിവരങ്ങള്‍ തേടിയിട്ടുണ്ട്. വെള്ളിയാഴ്ച്ചയാണ് മെഡല്‍ ഇവന്റുകള്‍ ആരംഭിക്കുന്നത്. എന്നാല്‍ അരുണ്‍ കുമാറിന് പകരക്കാരനെ ഇന്ത്യ പ്രഖ്യാപിച്ചിട്ടില്ല. ജൂഡോ ഫെഡറേഷന്‍ ഓഫ് ഇന്ത്യ പ്രസിഡന്റ് മുകേഷ് കുമാര്‍ ഇക്കാര്യം സ്ഥിരീകരിച്ചു. പകരക്കാരനെ പ്രഖ്യാപിക്കുക ദുഷ്‌കരമാണെന്നും അദ്ദേഹം പറഞ്ഞു. 
അരുണ്‍കുമാര്‍ ഉത്തേജക പരിശോധനയില്‍ പരാജയപ്പെട്ട കാര്യം കഴിഞ്ഞ ദിവസം മാത്രമാണ് അറിയിച്ചത്. 15 ദിവസത്തിനുള്ളില്‍ അദ്ദേഹം മറുപടി നല്‍കേണ്ടതുണ്ട്. എന്നാല്‍ നിയമപ്രകാരം അദ്ദേഹത്തിന് മത്സരിക്കാനാവില്ല. 
അതുപോലെ മറ്റൊരാളെ ടൂര്‍ണമെന്റിലേക്ക് പറഞ്ഞയക്കാനാവില്ല. തീര്‍ത്തും ദൗര്‍ഭാഗ്യകരമാണിത്. വലിയ പ്രതീക്ഷകള്‍ അരുണില്‍ ഞങ്ങള്‍ക്കുണ്ടായിരുന്നുവെന്നും മുകേഷ് കുമാര്‍ പറഞ്ഞു. 
2023 മക്കാവുവിലെ ജൂനിയര്‍ ഏഷ്യന്‍ കപ്പില്‍ 73 കിലോ വിഭാഗത്തില്‍ സ്വര്‍ണ മെഡല്‍ നേടിയ അരുണ്‍ ഇന്ത്യയുടെ ഉറച്ച മെഡല്‍ പ്രതീക്ഷയായിരുന്നു

വെയ്റ്റ്‌ലിഫ്റ്റിങ്ങിലും തിരിച്ചടികളുടെ ദിനം

ജൂഡോയിലെ തിരിച്ചടിക്ക് പിന്നാലെ വെയ്റ്റ്‌ലിഫ്റ്റിങ്ങിലും ഇന്ത്യ തിരിച്ചടി നേരിടുകയാണ്. ദില്‍ബാഗ് സിങ് ടൂര്‍ണമെന്റില്‍ നിന്ന് പിന്മാറിയിരിക്കുകയാണ്. ഒന്നിലധികം ഉത്തേജ വിരുദ്ധ നിയമങ്ങളുടെ ലംഘനങ്ങളെ തുടര്‍ന്ന് ഇന്ത്യന്‍ ടീമിന്റെ എണ്ണം കുറയ്ക്കാന്‍ തീരുമാനിച്ചതിന് പിന്നാലെയാണ് ദില്‍ബാഗ് പിന്‍മാറിയത്. യോഗ്യതാ ഘട്ടത്തിലാണ് ഇന്ത്യന്‍ താരങ്ങള്‍ക്കെതിരേ ഉത്തേജക വിവാദം ഉയര്‍ന്നിരിക്കുന്നത്. ഇതോടെ 16 അംഗങ്ങളില്‍ നിന്ന് 11 ആയി ടീമിനെ കുറച്ചിരിക്കുകയാണ്. ഒളിംപിക് മെഡല്‍ ജേതാവ് മീരാഭായ് ചാനു നയിക്കുന്ന 12 അംഗ സംഘത്തെയാണ് ഇന്ത്യന്‍ വെയ്റ്റ്‌ലിഫ്റ്റിങ് ഫെഡറേഷന്‍ പ്രഖ്യാപിച്ചിരിക്കുന്നത്. 
അതേസമയം വൈകിയ വേളയിലാണ് ഇന്ത്യയുടെ സംഘത്തിന്റെ എണ്ണം കുറച്ച കാര്യം അറിയിച്ചതെന്ന പരാതിയും വെയ്റ്റ്‌ലിഫ്റ്റിങ് താരങ്ങള്‍ക്കുണ്ട്. ദില്‍ബാഗിന് നേരത്തെ തന്നെ പരുക്കുണ്ടായിരുന്നു. ബിര്‍മിങ്ഹാമിലെ പരിശീലന ക്യാംപില്‍ താരം പരിശീലനവും നടത്തിയിരുന്നു. ഇതേ തുടര്‍ന്നാണ് താരത്തിനോട് പിന്മാറാന്‍ നിര്‍ദേശിച്ചത്. എന്‍. അജിത്, സായ് രാജ് പര്‍ദേശി, ഹര്‍ചരണ്‍ സിങ്, എന്നിവരെയാണ് ഉത്തേക പരിശോധനയില്‍ പരാജയപ്പെട്ടതിനെ തുടര്‍ന്ന് വിലക്കിയത്. യോഗ്യതാ ഘട്ടത്തില്‍ വനിതാ താരം വന്‍ഷിത വര്‍മയെയും ഉത്തേജക വിവാദത്തെ തുടര്‍ന്ന് വിലക്കിയിരുന്നു.