ചങ്ങരംകുളം: ജില്ലയിലെ പ്രധാന പൊലിസ് സ്റ്റേഷനുകളിലടക്കം തൊണ്ടിവാഹനങ്ങള്‍ തുരുമ്പെടുത്തു നശിക്കുന്നു. കോടികള്‍ വിലമതിക്കുന്ന വാഹനങ്ങളാണ് സ്റ്റേഷന്‍ വളപ്പുകളില്‍ നശിക്കുന്നത്. ഇതുകാരണം, ഇവയ്ക്കിടയില്‍ വാസമുറപ്പിക്കുന്ന തെരുവുപട്ടികള്‍ പെറ്റുപെരുകുന്നതായും ആക്ഷേപമുണ്ട്. വഴിയരികില്‍ ഉപേക്ഷിച്ചവ, അനധികൃത മണ്ണ്, മണല്‍ കടത്തുകള്‍ക്കു പിടികൂടിയവ, അപകടത്തില്‍പെട്ടവ തുടങ്ങിയ വാഹനങ്ങളാണ് പൊലിസ് സ്റ്റേഷനുകളിലുള്ളത്. ഇത്തരത്തില്‍ നൂറുകണക്കിനു വാഹനങ്ങളാണ് തുരുമ്പെടുത്തു നശിക്കുന്നത്. എന്നാല്‍, ഇവ ലേലം ചെയ്യാനോ വിട്ടുകൊടുക്കാനോ നടപടികളെടുക്കുന്നുമില്ല.
പൊന്നാനി, കുറ്റിപ്പുറം, ചങ്ങരംകുളം, പെരിന്തല്‍മണ്ണ, തിരൂര്‍, വളാഞ്ചേരി തുടങ്ങി ജില്ലയിലെ പ്രധാന സ്റ്റേഷനുകളിലെല്ലാം ഇതാണവസ്ഥ. കോടതി ഇടപെട്ടാല്‍മാത്രം ഒന്നോ രണ്ടേണ്ടാ തവണ ലേലം നടക്കുകയും പിന്നീട് ലേലനടപടികള്‍ ഉപേക്ഷിക്കുകയും ചെയ്യുകയാണ്. പിടിച്ചെടുക്കുന്ന വാഹനങ്ങള്‍ ഒന്നോ രണ്ടേണ്ടാ മാസത്തിനുളളില്‍ പിഴയടച്ചു കൊണ്ടുപോയില്ലെങ്കില്‍ ലേലം ചെയ്യാനുള്ള നിയമം പ്രാബല്യത്തില്‍ വരികയും കോടതിനടപടികള്‍ വേഗത്തില്‍ തീര്‍പ്പാക്കുകയും ചെയ്താല്‍ മാത്രമേ ഈ പ്രശ്‌നം പരിഹരിക്കാനാകൂവെന്നാണ് പൊലിസ് പറയുന്നത്.
വാഹനങ്ങള്‍ തുരുമ്പെടുത്തും കാടുപിടിച്ചും കിടക്കുന്നതു മൂലം സ്റ്റേഷന്‍ വളപ്പുകളില്‍ പട്ടികള്‍ പെറ്റുപെരുകുകയാണ്.