കൊല്ലം: കൊല്ലം-എറണാകുളം റെയില്‍വേ പാതയില്‍ ഇന്നു രാവിലെ വിള്ളല്‍ കണ്ടെത്തി. പത്തു മിനുറ്റിലധികം ഗതാഗതം തടസപ്പെട്ടു. കൊല്ലത്തിനും പെരിനാടിനും ഇടയില്‍ ചാത്തിനാംകുളം റെയില്‍വേ ഗേറ്റിന് സമീപമാണ് 9.30 ഓടെ വിള്ളല്‍ കണ്ടെത്തിയത്.

കൊല്ലത്ത് നിന്നും ഹൈദരാബാദ് ശബരി എക്‌സ്പ്രസ് കടന്നുപോയതിന് ശേഷം പാളത്തിലൂടെ നടന്നുപോയവരാണ് വിള്ളല്‍ കണ്ടത്. തൊട്ടടുത്ത റെയില്‍വേ ഗേറ്റില്‍ വിവരം അറിയിച്ചതിനെ തുടര്‍ന്ന് അധികൃതരെത്തി താല്‍ക്കാലിക വെല്‍ഡിങ് ജോലികള്‍ നടത്തി വിള്ളല്‍ പരിഹരിച്ചു. തുടര്‍ന്നു ട്രെയിനുകള്‍ വേഗത കുറച്ച് കടത്തിവിടുകയായിരുന്നു.
കാലാവസ്ഥ വ്യതിയാനമാണ് പാളം പൊട്ടാന്‍ കാരണമായതെന്നാണ് റെയില്‍വെയുടെ വിശദീകരണം. മൂന്ന് വര്‍ഷത്തിനിടെ നാലാംതവണയാണ് ഈ ഭാഗത്ത് വിള്ളല്‍ കണ്ടെത്തുന്നത്. കഴിഞ്ഞ ആഴ്ച കരുനാഗപ്പള്ളി മാരാരിത്തോട്ടത്തു ഗുഡ്‌സ് ട്രെയിന്‍ മറിഞ്ഞ് ഗതാഗതം തടസപ്പെട്ടിരുന്നു. ഈ സമയം ഇതുവഴി ട്രെയിനുകളില്ലാതിരുന്നതിനാല്‍ ഗതാഗത തടസം വലുതായി അനുഭവപ്പെട്ടില്ല.