ഗുരുവായൂര്‍: നഗരസഭ 43ാം വാര്‍ഡ് കൗണ്‍സിലര്‍ ശ്രീന സുവീഷിന്റ തലേങ്ങാട്ടിരിയിലെ വീടിനുനേരെ ആക്രമണം. ഇന്നലെ പുലര്‍ച്ചെ മൂന്നിന് ശ്രീനയും യൂത്ത് കോണ്‍ഗ്രസ് മണ്ഡലം പ്രസിഡന്റായ ഭര്‍ത്താവ് സുവീഷും കിടന്നിരുന്ന മുറിയുടെ ജനല്‍ച്ചില്ലുകള്‍ അക്രമികള്‍ അടിച്ചുതകര്‍ക്കുകയായിരുന്നു. ശബ്ദം കേട്ട് സുവീഷും സഹോദരന്‍ സേവാദള്‍ നേതാവ് സുമേഷും പുറത്തെത്തുമ്പോഴേക്കും അക്രമികള്‍ ഓടിരക്ഷപ്പെട്ടു. ഗുരുവായൂര്‍ പൊലിസ് സ്ഥലത്തെത്തി. പ്രദേശത്ത് കഞ്ചാവ് വില്‍പ്പനക്കെതിരേ ശ്രീനയും സുവീഷും പ്രതികരിച്ചിരുന്നെന്നും ഈ സംഘമാണ് അക്രമത്തിനു പിന്നിലെന്ന് കരുതുന്നതായും വീട്ടുകാര്‍ പറഞ്ഞു. ആക്രമണത്തില്‍ പ്രധിഷേധിച്ച് കോണ്‍ഗ്രസ് മണ്ഡലം കമ്മിറ്റി പ്രകടനം നടത്തി.