ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിയുടെ വിജയക്കുതിപ്പിനു കടിഞ്ഞാണ്‍. പെപ് ഗെര്‍ഡിയോള പരിശീലക സ്ഥാനമേറ്റ ശേഷം  സിറ്റി സീസണിലെ ആദ്യ പ്രീമിയര്‍ ലീഗ് തോല്‍വി നേരിട്ടു. ടോട്ടനം ഹോട്‌സ്പറാണ് സിറ്റിയെ മറുപടിയില്ലാത്ത രണ്ടു ഗോളുകള്‍ക്ക് വീഴ്ത്തിയത്.
മറ്റു മത്സരങ്ങളില്‍ മാഞ്ചസ്റ്റര്‍ യുനൈറ്റഡ് 1-1നു സ്റ്റോക് സിറ്റിയുമായി സമനിലയില്‍ പിരിഞ്ഞു. നിലവിലെ ചാംപ്യന്‍മാരായ ലെയ്സ്റ്റര്‍ സിറ്റിയെ സതാംപ്ടന്‍ ഗോള്‍രഹിത സമനിലയിലും തളച്ചു.
ഒന്‍പതാം മിനുട്ടില്‍ മാഞ്ചസ്റ്റര്‍ സിറ്റി പ്രതിരോധ താരം കൊളറോവ് സെല്‍ഫ് ഗോളിലൂടെ ടോട്ടനത്തിനു ഗോള്‍ ദാനം ചെയ്തപ്പോള്‍ 37ാം മിനുട്ടില്‍ ഡി അല്ലി അവരുടെ വിജയ ഗോളും സ്വന്തമാക്കി. ആദ്യ പകുതി ഗോള്‍രഹിതമായ മത്സരത്തില്‍ രണ്ടാം പകുതിയില്‍ ആന്റണി മാര്‍ഷ്യല്‍ മാഞ്ചസ്റ്റര്‍ യുനൈറ്റഡിനെ മുന്നില്‍ കടത്തി.
എന്നാല്‍ 82ാം മിനുട്ടിലെ ഗോളിലൂടെ അല്ലന്‍ സ്റ്റോകിനു സമനില സമ്മാനിക്കുകയായിരുന്നു.
ജയത്തോടെ ടോട്ടനം പോയിന്റ് പട്ടികയില്‍ രണ്ടാം സ്ഥാനത്തേക്കുയര്‍ന്നു. തോറ്റെങ്കിലും സിറ്റിയുടെ ഒന്നാം സ്ഥാനത്തിനു ഭീഷണിയില്ല. എങ്കിലും ടോട്ടനമുമായി അവര്‍ക്ക് ഒറ്റ പോയിന്റ് മാത്രമാണ് ലീഡ്.