തൃപ്രയാര്‍: ബാങ്ക് കെട്ടിടത്തിന്റെ ചില്ലില്‍ ദേശാടനക്കിളികള്‍ വന്നിടിച്ച് ചത്തു താഴെവീണു. ജീവനുണ്ടായിരുന്ന ഒരു കിളിയെ നാട്ടുകാര്‍ പരിചരിച്ചു വരികയാണ്. ഇന്നലെ രാവിലെ ഏഴോടെയാണ് സംഭവം. ശബ്ദംകേട്ട് വാഹനം ഇടിച്ചതാണെന്ന് കരുതിയാണ് തൃപ്രയാര്‍ പോളി ജംഗ്ഷനിലേക്ക് നാട്ടുകാര്‍ ഓടിയെത്തിയത്.
ജംഗ്ഷനില്‍ പ്രവര്‍ത്തിക്കുന്ന ബാങ്കിന്റെ പടികളിലും നടപ്പാതയിലുമൊക്കെയായി പന്ത്രണ്ട് കിളികളും ട്രസിന്റെ മുകളില്‍ രണ്ടുകിളികളുമാണ് ചത്തുവീണത്. പരിസരത്തെ മരച്ചില്ലകളുടെയും ആകാശത്തിന്റെയും പ്രതിരൂപം ബാങ്ക് കെട്ടിടത്തിലെ ചില്ലില്‍ കണ്ട് തെറ്റിധരിച്ച് മരത്തില്‍ ഇരിക്കാമെന്ന ധാരണയില്‍ ഗ്ലാസില്‍വന്ന് ഇടിച്ചതാകുമെന്ന് നാട്ടുകാര്‍ പറഞ്ഞു. അതിവേഗത്തില്‍ പറക്കാന്‍ കഴിയുന്ന കിളികളാണ് ചത്തത്.