മുക്കം: കാരശ്ശേരി, കൊടിയത്തൂര്‍ പഞ്ചായത്തുകളെ ലഹരി മുക്തമാക്കുന്നതിന്റെ ഭാഗമായി കക്കാടില്‍ ലഹരി വിരുദ്ധ ജനകീയവേദിയുടെ നേതൃത്വത്തില്‍ ജനകീയ കൂട്ടായ്മ സംഘടിപ്പിച്ചു.
വാര്‍ഡ് മെമ്പര്‍ ജി. അബ്ദുല്‍ അക്ബര്‍ ഉദ്ഘാടനം ചെയ്തു. വിദ്യാര്‍ഥികള്‍ ആണ് കൂടുതലായും ലഹരി വിപണനക്കാരുടെ വലയില്‍ വീഴുന്നത്. ഇതിനെക്കുറിച്ച് രക്ഷിതാക്കള്‍ക്ക് ബോധവല്‍ക്കരണ ക്ലാസുകള്‍ നല്‍കും.
വിവിധ കേന്ദ്രങ്ങളില്‍ അയല്‍ക്കൂട്ടങ്ങള്‍ നടത്തി സ്ത്രീകളെയും ലഹരിക്കെതിരേ സജ്ജരാക്കും. ലഘുലേഖകള്‍ വിതരണം ചെയ്യും. മാളിയേക്കല്‍ കടവ് , കല്ലടയില്‍ , മാടകശ്ശേരി കോളനി എന്നിവിടങ്ങളില്‍ പുറമെ നിന്നുള്ളവര്‍ ലഹരി വസ്തുക്കള്‍ കൈമാറുന്നതിനും ഉപയോഗിക്കുന്നതിനുമായി എത്തുന്നുണ്ട് .
ഇത്തരക്കാരെ നിരീക്ഷിക്കുന്നതിന് സമിതി രൂപീകരിച്ചു.  ഈ ഭാഗങ്ങളില്‍ തെരുവ് വിളക്കുകള്‍ സ്ഥാപിക്കുന്നതിന് നടപടികള്‍ സ്വീകരിക്കും. നവംബര്‍ ആറിന് നടക്കുന്ന മനുഷ്യച്ചങ്ങലയില്‍ പരമാവധി ജനങ്ങളെ പങ്കെടുപ്പിച്ച് വിജയിപ്പിക്കാനും യോഗത്തില്‍ തീരുമാനമായി. മുനവ്വിര്‍ കൊടിയത്തൂര്‍ , ഇ.അഹമ്മദ് കുട്ടി, എം.ശുക്കൂര്‍, എടത്തില്‍ അബ്ദുറഹ്മാന്‍, വടക്കയില്‍ അബ്ദുറഹ്മാന്‍ , കെ.ലുഖ്മാന്‍, പാറമ്മല്‍ അബ്ദുല്‍ മജീദ്, അബ്ദുസ്സമദ് കെ.സി സംസാരിച്ചു.
എം. അഹമ്മദ്കുട്ടി മാസ്റ്റര്‍ അധ്യക്ഷത വഹിച്ചു. ടി.പി അബൂബക്കര്‍ സ്വാഗതവും കെ.അബ്ദു മാസ്റ്റര്‍ നന്ദിയും പറഞ്ഞു.