അരീക്കോട്: കീഴുപറമ്പ് പഞ്ചായത്തിന്റെ ജനകീയോത്സവമായ കീഴുപറമ്പ് ഉത്തരമേഖലാ ജലോത്സവം 16ന് നടക്കും. ജില്ലാ ടൂറിസം വകുപ്പിന്റെ സഹകരണത്തോടെ കീഴുപറമ്പിലെ സി.എച്ച് മുഹമ്മദ് കോയ മെമ്മോറിയല്‍ ക്ലബിന്റെ ആഭിമുഖ്യത്തിലാണ് 27 വര്‍ഷമായി ജലോത്സവം സംഘടിപ്പിച്ച് വരുന്നത്. 1989ലാണ് ഇരുപതോളം ടീമുകളെ പങ്കെടുപ്പിച്ച് ജലോത്സവം തുടങ്ങിയത്. ഇടക്ക് എടശ്ശേരിക്കടവ് പാലത്തിന്റെ നിര്‍മാണ പ്രവര്‍ത്തനങ്ങളുടെ ഭാഗമായി 4 വര്‍ഷം ഉത്സവം നിര്‍ത്തിവക്കേണ്ടി വന്നു.
ഓണാഘോഷത്തിന്റെ ഭാഗമായാണ് ആദ്യം വള്ളം കളി തുടങ്ങിയതെങ്കിലും പിന്നീട് സമയക്രമം മാറ്റുകയായിരുന്നു. ഇത്തവണ 9 അംഗങ്ങള്‍ തമ്മിലാവും മല്‍സരം. വാഴക്കാട്, ഊര്‍ക്കടവ്, എടവണ്ണപ്പാറ, ആക്കോട്, ചെറുവാടി, വെട്ടത്തൂര്‍, വാവൂര്‍, വെട്ടുപാറ, മൈത്ര, കുനിയില്‍, നിലമ്പൂര്‍, മമ്പാട്, കല്ലിങ്ങല്‍ തുടങ്ങിയ ടീമുകള്‍ തമ്മിലാണ് ഇത്തവണ മല്‍സരം നടക്കുക. ഒന്ന്, രണ്ട്, മൂന്ന് സ്ഥാനക്കാര്‍ക്ക് 25,000, 15000, 5000 എന്നിങ്ങനെയാണ് സമ്മാന തുക. 16ന് രാവിലെ 9.30ന് കീഴുപറമ്പില്‍ നിന്ന് ജനകീയ ഘോഷയാത്ര ആരംഭിക്കും. പി.കെ ബഷീര്‍ എം.എല്‍.എ ഉദ്ഘാടനം ചെയ്യും. ടി.വി ഇബ്രാഹിം എം.എല്‍.എ, അരീക്കോട് ബ്ലോക്ക് പഞ്ചായത്ത് പ്രസിഡന്റ് പറമ്പന്‍ ലക്ഷ്മി, ജില്ലാ പഞ്ചായത്ത് അംഗം ഇസ്മാഈല്‍ മൂത്തേടം എന്നിവര്‍ സംബന്ധിക്കും.