ബദിയടുക്ക: മാര്‍പ്പനടുക്കയില്‍ സി.പി.എം-ബി.ജെ.പി സംഘര്‍ഷം. സി.പി.എം പ്രവര്‍ത്തകന്റെ ബൈക്ക് തകര്‍ത്തു. സംഘര്‍ഷത്തില്‍ രണ്ടുപേര്‍ക്ക് പരുക്കേറ്റു. ബി.ജെ.പി പ്രവര്‍ത്തകനും മാര്‍പ്പനടുക്ക എ.പി.എസ് സര്‍ക്കിളിലെ ക്വാര്‍ട്ടേഴ്‌സില്‍ താമസക്കാരനുമായ ശരത് (20), സി.പി.എം പ്രവര്‍ത്തകന്‍ കിരണ്‍ (22) എന്നിവര്‍ക്കാണ് പരുക്കേറ്റത്. ശരതിനെ കാസര്‍കോട്ടെ സ്വകാര്യ ആശുപത്രിയിലും കിരണിനെ ചെങ്കള ഇ.കെ നായനാര്‍ ആശുപത്രിയിലും പ്രവേശിപ്പിച്ചു. സി.പി.എം പ്രവര്‍ത്തകന്‍ കിരണ്‍ പത്മാറിന്റെ മാര്‍പ്പനടുക്കയില്‍ നിര്‍ത്തിയിട്ടിരുന്ന ബൈക്കാണ് തകര്‍ത്തത്.
അതിനിടെ വെള്ളിയാഴ്ച്ച രാത്രി എട്ടോടെ വീട്ടിലേക്ക് നടന്ന് പോകുന്നതിനിടെ സി.പി.എം പ്രവര്‍ത്തകര്‍ തടഞ്ഞു നിര്‍ത്തി സി.പി.എം ഓഫിസിനടുത്തേക്ക് വലിച്ചുക്കൊണ്ടു പോയി മര്‍ദ്ദിക്കുകയായിരുന്നുവെന്ന് ശരത് പൊലിസില്‍ നല്‍കിയ പരാതിയില്‍ വ്യക്തമാക്കി. ഹര്‍ത്താല്‍ ദിവസം നടത്തിയ പ്രകടനത്തിനിടെ സി.പി.എമ്മിനെതിരെ മുദ്രാവാക്യം വിളിച്ചുവെന്നാരോപിച്ചായിരുന്നു മര്‍ദ്ദനമെന്ന് പറയുന്നു.
ശരതിന്റെ പരാതിയില്‍ സി.പി.എം പ്രവര്‍ത്തകരായ കുമ്പഡാജെയിലെ കിരണ്‍, ഗിരീഷ്, കിരണ്‍കുമാര്‍ എന്നിവര്‍ക്കെതിരെ ബദിയടുക്ക പൊലിസ് കേസെടുത്തു. സി.പി.എം പ്രവര്‍ത്തകര്‍ നല്‍കിയ പരാതിയില്‍ ബി.ജെ.പി പ്രവര്‍ത്തകര്‍ക്കെതിരേയും കേസെടുത്തു.