മലപ്പുറം: ജില്ലയുടെ വിവിധ ഭാഗങ്ങളില്‍ മോട്ടോര്‍വാഹനവകുപ്പ് ഉദ്യോഗസ്ഥരുടെ നേതൃത്വത്തില്‍ നടന്ന പരിശോധനയില്‍ 1,11,200 രൂപ പിഴ ഈടാക്കി. പരിശോധനയുടെ ഭാഗമായി 48 ബസുകള്‍ പരിശോധന നടത്തി. ഇതില്‍ സ്പീഡ് ഗവേര്‍ണര്‍ പ്രവര്‍ത്തനരഹിതമായ നിലയില്‍ കണ്ടെത്തിയ 19 ബസുകള്‍ക്ക് സ്റ്റോപ് മെമ്മോ നല്‍കി സര്‍വീസ് നിര്‍ത്തിവെക്കാന്‍ ഉത്തരവിട്ടു.
തിരൂര്‍, വളാഞ്ചേരി, അരീക്കോട്, വണ്ടൂര്‍, തിരൂരങ്ങാടി, പെരിന്തല്‍മണ്ണ എന്നിവടങ്ങളിലെ സ്വകാര്യ ബസുകളിലാണു നിയമലംഘനങ്ങള്‍ കണ്ടെത്തിയത്. പരിശോധനയുടെ ഭാഗമായി 217 ഇരുചക്രവാഹനങ്ങളും പരിശോധിച്ചു. ഇതില്‍ ഹെല്‍മറ്റില്ലാത്ത 134 പേരെയും ഡ്രൈവിംഗ് ലൈസന്‍സില്ലാത്ത 24 പേരെയും കണ്ടെത്തി.
മൂന്നു പേര്‍ വീതം യാത്രചെയ്തതിന് ഒന്‍പതു പേരെയും മൊബൈല്‍ ഉപയോഗിച്ചതിനു നാലു പേരെയും പിടികൂടി. രണ്ടു പേരുടെ ലൈസന്‍സ് റദ്ദാക്കി.