നെടുങ്ങാട്: വഴിത്തര്‍ക്കത്തിന്റെ പരാതി അനേഷിക്കാനെത്തിയ അരുവിക്കര പൊലിസ് വൃദ്ധദമ്പതികളെയും മകളെയും വീട്ടില്‍ കയറി മര്‍ദിച്ചതായി പരാതി.
കരകുളം ഏണിക്കര ചെക്കാലവിളാകത്ത് വീട്ടില്‍ ചന്ദ്രന്‍ (63), ഭാര്യ ചന്ദ്രിക (57) മകള്‍ രജനി (28) എന്നിവര്‍ക്കാണ് മര്‍ദനമേറ്റത്. മര്‍ദനത്തില്‍ ഗുരുതരമായി പരുക്കേറ്റ ചന്ദ്രികയെ പേരൂര്‍ക്കട ആശുപത്രിയില്‍ നിന്നും മെഡിക്കല്‍ കോളെജാശുപത്രിയിലേയ്ക്ക് മാറ്റി.
ചൊവ്വാഴ്ച ഉച്ചയ്ക്കാണ് സംഭവം.  ചന്ദ്രന്റെ അയല്‍വാസിയായ കാഞ്ചന വഴിതര്‍ക്കവുമായി ബന്ധപ്പെട്ട് അരുവിക്കര പൊലിസ് പരാതി നല്കിയിരുന്നു. സ്റ്റേഷനിലെ അഡീഷണല്‍ എസ്.ഐ ഷാജഹാന്റെ നേതൃത്വത്തിലെത്തിയ പൊലിസ്് ചന്ദ്രനെ അന്വേഷിച്ച് വീട്ടിലേയ്ക്ക് തള്ളിക്കയറി.  വീട്ടില്‍ ശസത്രക്രിയ കഴിഞ്ഞ് വിശ്രമിക്കുകയായിരുന്ന മകനെ പൊലിസ് ഉപദ്രിവിക്കുന്നത് കണ്ട് തടയാനെത്തിയ ചന്ദ്രികയെ പൊലിസ് ചവിട്ടി തള്ളിയിട്ടുവെന്ന് ഡി.ജി.പിക്ക് നല്കിയ പരാതിയില്‍ പറയുന്നു.
സ്ഥലത്തെത്തിയ ചന്ദ്രനെ പൊലിസ് അക്രമിച്ച് വാഹനത്തില്‍ കയറ്റി സ്റ്റേഷനിലേയ്ക്ക് കൊണ്ടു പോയി.  നാട്ടുകാര്‍ നോക്കിനില്‌ക്കെയാണ് പൊലിസ് അതിക്രമം കാട്ടിയത്. വഴിതര്‍ക്കം ഒത്തുതീര്‍പ്പാക്കാനാണ് കാഞ്ചന പരാതി നല്‍കിയത്. എന്നാല്‍ പൊലിസ് ചന്ദ്രന്റെ വീട്ടില്‍ കയറി നടത്തിയ അക്രമം നാട്ടുകാര്‍ കണ്ടതിനാല്‍ ഇയാള്‍ക്കെതിരേ  സ്ത്രീകളോട് മോശമായി പെരുമാറിയെന്ന വകുപ്പ്കൂടി ചേര്‍ത്ത് കേസെടുത്ത് കോടതിയില്‍ ഹാജരാക്കുകകയായിരുന്നെന്ന് ബന്ധുക്കള്‍ പറഞ്ഞു. എന്നാല്‍ പരാതി അന്വേഷിച്ച് പോയതാണെന്നും വീട്ടില്‍ കയറി ആരെയും മര്‍ദ്ദിച്ചിട്ടില്ലെന്നും അരുവിക്കര പൊലിസ് പറഞ്ഞു.