നെടുമ്പാശ്ശേരി: അന്താരാഷ്ട്ര വിമാനത്താവളത്തില്‍ നിന്നും യാത്രക്കാരുടെയും സന്ദര്‍ശകരുടെയും ബാഗുകളും പേഴ്‌സുകളും സ്ഥിരമായി മോഷ്ടിക്കുന്നയാളെ നെടുമ്പാശ്ശേരി പൊലിസ് അറസ്റ്റ് ചെയ്തു. കൊല്ലം സ്വദേശി നാസര്‍ (52) ആണ് നെടുമ്പാശേരി സര്‍ക്കിള്‍ ഇന്‍സ്‌പെക്ടര്‍ എ.കെ വിശ്വനാഥന്റെ പിടിയിലായത്. കഴിഞ്ഞ കുറേ നാളുകളായി ഇയാള്‍ മോഷണം നടത്തി വരികയായിരുന്നു.
വിമാനത്താവളത്തിന് പുറത്ത് സന്ദര്‍ശകര്‍ക്ക് ഇരിക്കാനുള്ള ഭാഗത്ത് എത്തുന്ന ഇയാള്‍ തന്റെ കൈയിലിരിക്കുന്ന ബാഗ് മറ്റേതെങ്കിലും ബാഗിന് സമീപം വച്ച ശേഷം തന്റെ ബാഗിന്റെ സിബ് തുറന്ന് അടുത്തിരിക്കുന്ന ബാഗ് ഇതിനകത്താക്കിയ ശേഷം അതി വിദഗ്ധമായി കടന്നുകളയുകയായിരുന്നു. നിരവധി പേരാണ് ഇതുസംബന്ധിച്ച് നെടുമ്പാശ്ശേരി പൊലിസില്‍ പരാതി നല്‍കിയിരുന്നത്.
സി.സി ടി.വി ദൃശ്യങ്ങളില്‍ നിന്നാണ് പൊലീസ് മോഷ്ടാവിനെ തിരിച്ചറിഞ്ഞത്. മാന്യമായ വസ്ത്രം ധരിച്ച് എത്തുന്ന ഇയാളെ പെട്ടെന്ന് ആരും സംശയിക്കില്ല. എതാനും ദിവസങ്ങളായി ഇയാള്‍ക്ക് വേണ്ടി വിമാനത്താവളത്തില്‍ പൊലീസ് വലവീശിയിരുന്നു. ഇന്ന് ഇയാളെ കോടതിയില്‍ ഹാജരാക്കും.