ചെറുവത്തൂര്‍: സംസ്ഥാനത്തെ അങ്കണവാടികളിലൂടെ പ്രീ പ്രൈമറി വിദ്യാഭ്യാസം ഏകോപിപ്പിക്കാന്‍ വിദ്യാഭ്യാസ വകുപ്പ് സാധ്യതകള്‍ തേടുന്നു. വിദ്യാലയങ്ങളോടു ചേര്‍ന്ന് പ്രീ പ്രൈമറികള്‍ ആരംഭിക്കുന്നതു സര്‍ക്കാരിനു വലിയ സാമ്പത്തിക ബാധ്യത വരുത്തുന്നതിനെ തുടര്‍ന്നാണ് ഇത്തരത്തിലൊരു ആലോചനയുമായി പൊതുവിദ്യാഭ്യാസ വകുപ്പ് മുന്നോട്ടുപോകുന്നത്.
പ്രീ പ്രൈമറി വിദ്യാഭ്യാസം അങ്കണവാടികളിലൂടെ ഏകോപിപ്പിക്കുന്നതിനും സുഗമമാക്കുന്നതിനുമുള്ള നിര്‍ദേശങ്ങള്‍ സമര്‍പ്പിക്കാന്‍ പൊതുവിദ്യാഭ്യാസ ഡയറക്ടര്‍ വിദ്യാഭ്യാസ ഓഫിസര്‍മാരോട് ആവശ്യപ്പെട്ടിട്ടുണ്ട്. പദ്ധതി പ്രാവര്‍ത്തികമായാല്‍ കുട്ടികളുടെ എണ്ണം കുറഞ്ഞതിനെ തുടര്‍ന്നു പ്രതിസന്ധിയിലായ അങ്കണവാടികള്‍ക്കു പുത്തനുണര്‍വാകും. സംസ്ഥാനത്തു പലയിടങ്ങളിലും സര്‍ക്കാര്‍ വിദ്യാലയങ്ങളോടു ചേര്‍ന്ന് പി.ടി.എ കമ്മിറ്റിയുടെ നിയന്ത്രണത്തില്‍ പ്രീ പ്രൈമറികള്‍ പ്രവര്‍ത്തിച്ചുവരുന്നുണ്ട്. ഒന്നാം ക്ലാസിലേക്കു കുട്ടികളെ എത്തിക്കുക എന്ന ലക്ഷ്യത്തോടെയാണ് പ്രീ പ്രൈമറി ക്ലാസുകള്‍ ആരംഭിക്കാന്‍ സര്‍ക്കാര്‍ വിദ്യാലയങ്ങള്‍ തീരുമാനിച്ചത്. യോഗ്യതയോ പരിചയമോ നോക്കാതെയാണ് ഇവിടങ്ങളില്‍ പി.ടി.എ നിയമനങ്ങള്‍ നടത്തുന്നത്.
എന്നാല്‍, പലതരത്തിലുള്ള പരാതികളുടെ അടിസ്ഥാനത്തില്‍  2012 ഓഗസ്റ്റില്‍ സേവനത്തിലുണ്ടായിരുന്ന ജീവനക്കാര്‍ക്ക് ഓണറേറിയം അനുവദിക്കാന്‍ സര്‍ക്കാര്‍ നിര്‍ബന്ധിതമായിരുന്നു. ഇതു വലിയ സാമ്പത്തിക ബാധ്യത വരുത്തിവച്ചപ്പോള്‍ പുതിയ പ്രീ പ്രൈമറികള്‍ അനുവദിക്കാനോ പുതിയ നിയമനങ്ങള്‍ നടത്താനോ പാടില്ലെന്ന് 2012 ഡിസംബറില്‍ സര്‍ക്കാര്‍ ഉത്തരവിറക്കി. ഇതു മുഖവിലയ്‌ക്കെടുക്കാതെ പി.ടി.എകള്‍ പലയിടങ്ങളിലും പ്രീ പ്രൈമറികള്‍ ആരംഭിക്കുകയും നിയമനം നടത്തുകയും ചെയ്തു. ഈ ജീവനക്കാര്‍ ഇപ്പോള്‍ ഓണറേറിയം ആവശ്യപ്പെട്ടു ഹൈക്കോടതി, മനുഷ്യാവകാശ കമ്മിഷന്‍, സംസ്ഥാന ബാലാവകാശ കമ്മിഷന്‍ എന്നിവയെ സമീപിച്ചിരിക്കുകയാണ്. ഈ സാഹചര്യത്തിലാണു നിലവിലുള്ള നിരോധനം പിന്‍വലിക്കാതെ പ്രീ പ്രൈമറി വിദ്യാഭ്യാസം സംസ്ഥാനത്തെ അങ്കണവാടികളിലൂടെ ഏകോപിപ്പിക്കാന്‍ വിദ്യാഭ്യാസ വകുപ്പ് സാധ്യതകള്‍ തേടുന്നത്.
സാമൂഹ്യനീതി വകുപ്പിനു കീഴില്‍ 33,000ത്തിലധികം അങ്കണവാടികള്‍ സംസ്ഥാനത്തു പ്രവര്‍ത്തിക്കുന്നുണ്ട്.
ഇംഗ്ലീഷ് മീഡിയം സ്‌കൂളുകളുടെയും പ്രീപ്രൈമറി സ്‌കൂളുകളുടെയും വ്യാപനത്തെ തുടര്‍ന്ന് ഇവിടങ്ങളില്‍ കുട്ടികളുടെ എണ്ണം ഗണ്യമായി കുറഞ്ഞിരിക്കുകയാണ്. മൂന്നുവയസു മുതലുള്ള കുട്ടികള്‍ക്കാണ് അങ്കണവാടികളില്‍ പ്രവേശനം നല്‍കുന്നത്. എന്നാല്‍ എല്‍.കെ.ജി ക്ലാസുകളിലേക്ക് ഈ പ്രായത്തില്‍ തന്നെ കുട്ടികളെ പ്രവേശിപ്പിച്ചു തുടങ്ങുന്നതാണു നിലവിലെ സ്ഥിതി.
വിദ്യാഭ്യാസത്തിനു പുറമേ കുട്ടികളുടെ ആരോഗ്യ സുരക്ഷയും ഉറപ്പുവരുത്തുന്ന അങ്കണവാടികള്‍ക്കു പുതിയമുഖം നല്‍കാന്‍ ഈ നിര്‍ദേശം നടപ്പാക്കിയാല്‍ സാധിക്കുമെന്ന് വിലയിരുത്തപ്പെടുന്നു.