വൈക്കം: വൈക്കം താലൂക്കിലെ മുയല്‍കര്‍ഷകര്‍ നേരിടുന്ന പ്രശ്‌നങ്ങള്‍ പരിഹരിക്കണമെന്ന് സി.കെ ആശ എം.എല്‍.എ നിയമസഭയില്‍ ആവശ്യപ്പെട്ടു.
2011-12 കാലഘട്ടത്തില്‍ മുയല്‍കൃഷി ആരംഭിച്ച അറുന്നുറോളം കര്‍ഷകര്‍ കാലവര്‍ഷകെടുതിയെ തുടര്‍ന്ന് മുയലുകള്‍ കൂട്ടത്തോടെ ചത്തൊടുങ്ങിയതിനാല്‍ കടുത്ത സാമ്പത്തിക പ്രതിസന്ധിയിലാണ്. കൂടാതെ മുയലുകളെ കൊല്ലാന്‍ പാടില്ല എന്നുള്ള കേന്ദ്രഗവണ്‍മെന്റിന്റെ നയവും ഈ കര്‍ഷകര്‍ക്ക് തിരിച്ചടിയായി. ബാങ്കുകളില്‍ നിന്നും വായ്പ എടുത്ത് മുയല്‍കൃഷി ആരംഭിച്ച കര്‍ഷകര്‍ ഇപ്പോള്‍ ജപ്തി നടപടി നേരിടുകയാണ്. ജപ്തി നടപടികള്‍ അടിയന്തിരമായി നിര്‍ത്തിവയ്ക്കണമെന്നും കര്‍ഷകര്‍ എടുത്ത വായ്പാതുക എഴുതിതള്ളണമെന്നും എം.എല്‍.എ നിയമസഭയില്‍ ആവശ്യപ്പെട്ടു.
ജപ്തി നടപടികളില്‍ മൊറട്ടോറിയം പ്രഖ്യാപിക്കുന്ന കാര്യം റവന്യൂ മന്ത്രിയുമായി ആലോചിച്ച് തീരുമാനിക്കുമെന്നും വായ്പാ കുടിശ്ശിക എഴുതിതള്ളുന്നകാര്യം പരിഗണിക്കുമെന്നും മന്ത്രി കെ രാജു നിയമസഭയില്‍ ഉറപ്പുനല്‍കിയതായും എം.എല്‍.എ അറിയിച്ചു.