മണ്ണാര്‍ക്കാട്: മണ്ണാര്‍ക്കാട്ടെ കെ.എസ്.ആര്‍.ടി.സി സബ് ഡിപ്പൊയെ മാതൃകാ ഡിപ്പൊ ആക്കി ഉയര്‍ത്തിയത് പ്രഖ്യാപനത്തിലൊതുങ്ങി. ഇടതുസര്‍ക്കാര്‍ അധികാരത്തിലെത്തിയതിനു ശേഷം ജില്ലകളിലെ ഓരോ സബ് ഡിപ്പൊകളെ മാതൃകാ ഡിപ്പൊകളായി പ്രഖ്യാപിച്ചിരുന്നു. പാലക്കാട് ജില്ലയില്‍ ഇതിന് സ്ഥാനം പിടിച്ച ഡിപ്പൊയാക്ക് മണ്ണാര്‍ക്കാട്. എന്നാല്‍ പ്രഖ്യാപനമല്ലാതെ ഇതുമായി ബന്ധപ്പെട്ട തുടര്‍ വികസന പ്രവര്‍ത്തനങ്ങളൊന്നും തന്നെ ഇതുവരെ നടന്നിട്ടില്ല.
തിരഞ്ഞെടുത്ത ഡിപ്പൊകള്‍ കേന്ദ്രീകരിച്ച് അടിസ്ഥാന സൗകര്യ വികസനങ്ങളൊരുക്കി കൂടുതല്‍ സര്‍വീസുകള്‍ നടത്തി കെ.എസ്.ആര്‍.ടി.സിയെ ലാഭത്തിലാക്കാന്‍ ഉദ്ദേശിച്ചാണ് പദ്ധതി തുടങ്ങിയത്. മൂന്നു മാസത്തോളം ഇതു സംബന്ധിച്ച് ചര്‍ച്ചകളും അവലോകന യോഗവും നടന്നെങ്കിലും പിന്നീട് കെ.എസ്.ആര്‍.ടി.സിയുടെ തലപ്പത്തുണ്ടായ അഴിച്ചുപണിയെ തുടര്‍ന്ന് പദ്ധതി നിലച്ചിരിക്കുകയാണ്. ഇതോടെ മണ്ണാര്‍ക്കാട് കെ.എസ്.ആര്‍..ടി.സി സബ് ഡിപ്പൊയുടെ പ്രതീക്ഷകളും അസ്ഥാനത്തായി.
മണ്ണാര്‍ക്കാട് സബ്ഡിപ്പൊ ജീവനക്കാരുടെ കുറവും, ബസുകളുടെ കാലപ്പഴക്കവും വികസനത്തെ പ്രതികൂലമായി ബാധിച്ചിരിക്കുകയാണ്. നിലവില്‍ മണ്ണാര്‍ക്കാട് സബ് ഡിപ്പൊയില്‍ 43 ബസുകള്‍ കണക്കിലുണ്ട്. എന്നാല്‍ ഇതില്‍ 37 ബസുകള്‍ മാത്രമാണ് ഇപ്പോല്‍ സര്‍വീസ് നടത്തുന്നത്. ശേഷിക്കുന്നവ കട്ടപ്പുറത്താണ്. ഇവിടെ നിന്നും ആകെ 40 ഷെഡ്യൂളുകളാണുളളത്. ചളവ, ഒറ്റപ്പാലം, ഉപ്പുകുളം ഈ മൂന്നു റൂട്ടിലൂടെയുളള സര്‍വീസുകള്‍ നിലച്ചിട്ട് വര്‍ഷങ്ങളായി. മാതൃകാ ഡിപ്പൊയുടെ തുടര്‍ പ്രവര്‍ത്തനങ്ങള്‍ പുനരാരംഭിച്ച് അട്ടപ്പാടി ഉള്‍പ്പെടെയുളള മലയോര പിന്നോക്ക മേഖലകളെ ഉള്‍കൊളളുന്ന മണ്ണാര്‍ക്കാട് സബ് ഡിപ്പൊയുടെ വികസനം യാഥാര്‍ഥ്യമാക്കണമെന്ന ആവശ്യം ശക്തമാണ്..