നെടുമങ്ങാട്: അമിത വേഗതയില്‍ വന്ന കാര്‍ ഇടിച്ചു ബൈക്ക് യാത്രക്കാരനായ ഗവ.പ്രസ് ജീവനക്കാരന്‍ മരിച്ചു. മണ്ണന്തല സര്‍ക്കാര്‍ പ്രസിലെ ജീവനക്കാരനായ നെടുമങ്ങാട് ചെല്ലാംകോട് എല്‍.പി.എസിന് സമീപം അമൃതത്തില്‍ ശ്രീകണ്ഠന്‍ (48) ആണ് മരിച്ചത്. തിങ്കളാഴ്ച ഉച്ചയ്ക്ക് മൂന്നു മണിക്ക് മുക്കോലയ്ക്കല്‍ ജങ്ഷനിലായിരുന്നു അപകടം. ഇടിയുടെ ആഘാതത്തില്‍ ശ്രീകണ്ഠന്‍ ബൈക്കില്‍ നിന്നും തെറിച്ച് കാറിന്റെ മുന്‍വശത്തെ ഗ്ലാസില്‍ വീണു. കാറിന്റെ ഗ്ലാസ് പൊട്ടിച്ചിതറി. ഓടിക്കൂടിയ നാട്ടുകാര്‍ നെടുമങ്ങാട് ജില്ല ആശുപത്രിയിലും തുടര്‍ന്ന് തിരുവന്തപുരത്തെ സ്വകാര്യ ആശുപത്രിയിലും എത്തിച്ചെങ്കിലും നാലുമണിയോടെ മരിച്ചു. മൃതദേഹം മെഡിക്കല്‍ കോളജാശുപത്രി മോര്‍ച്ചറിയിലേയ്ക്ക് മാറ്റി. ഭാര്യ:സജിത. രണ്ട് വയസുകാരനായ ശരവണന്‍ ഏകമകനാണ്. സംസ്‌കാരം ചൊവ്വാഴ്ച ഉച്ചയ്ക്ക് നടക്കുമെന്ന് ബന്ധുക്കള്‍ അറിയിച്ചു.