കഠിനംകുളം: കഴക്കൂട്ടം ബൈപ്പാസ് റോഡില്‍ ടയോട്ട ഷോറൂമിന് സമീപം രണ്ടാംനിലയില്‍ പ്രവര്‍ത്തിക്കുന്ന കോഫീ ഷോപ്പ് ഇന്നലെ ഉച്ചയ്ക്ക് ഒരുമണിക്ക് കത്തിനശിച്ചു. കുളത്തൂര്‍ സ്വദേശി പ്രശാന്ത് ശാസ്തമംഗലം സ്വദേശി നന്ദിത എന്നിവരുടെ ഉടമസ്ഥതയിലുള്ള കോഫീ അണ്‍ പ്ലഗ്ഗ്ഡ് എന്ന കോഫീ ഷോപ്പിലാണ് തീ പിടിത്തം ഉണ്ടായത്.
വളരെക്കാലം അടഞ്ഞു കിടന്ന കോഫീ ഷോപ്പ് നാല് ദിവസങ്ങള്‍ക്കു മുന്‍പാണ് പുതിയതായി തുറന്ന് പ്രവര്‍ത്തനം ആരംഭിച്ചത്. തീപിടുത്തം ഉണ്ടായപ്പോള്‍ നാല് ജീവനക്കാര്‍ മാത്രമേ ഉണ്ടായിരുന്നുള്ളു.
ഓല പനയോല തടിയും ഉപയോഗിച്ചാണ് ഷോപ്പ് നിര്‍മിച്ചിരുന്നത് ഫാന്‍ പ്രവര്‍ത്തിച്ചപ്പോള്‍ ഷോര്‍ട് സര്‍ക്ക്യൂട്ട് ഉണ്ടായി തീ പെട്ടന്ന് പടര്‍ന്നു പിടിച്ചാണ് അപകടം ഉണ്ടായതെന്ന് ജീവനക്കാര്‍ പറഞ്ഞു. ജീവനക്കാര്‍ ഓടി മാറിയതിനാല്‍ ആളപായം ഉണ്ടായില്ല. ഫ്രിഡ്ജ് കോഫീ മിഷ്യന്‍, വാട്ടര്‍ ടാങ്ക്, കമ്പ്യൂട്ടര്‍ ഇലക്ട്രിക് ഉപകരണങ്ങള്‍ മേശ കസേര എന്നിവ കത്തിനശിച്ചു. ഏകദേശം 10 ലക്ഷം രൂപയുടെ നാശനഷ്ടം ഉണ്ടായതായി കണക്കാക്കുന്നു. തീപിടുത്തം ഉണ്ടായതറിഞ്ഞു ടെക്‌നോപാര്‍ക്കില്‍ നിന്നും ഫയര്‍ യൂനിറ്റ് എത്തി തീ കെടുത്തുകയായിരുന്നു.