എരുമേലി: കൊച്ചമ്പലത്തില്‍ നിന്നും ശ്രീ ധര്‍മ്മശാസ്താ ക്ഷേത്രം വരെയുളള റോഡിന്റെ ഇരുവശത്തും അഞ്ച് മീറ്റര്‍ വീതിയില്‍ പേട്ടതുളളല്‍ പാത, രണ്ട് ബൈപ്പാസ് എന്നിവ നിര്‍മിക്കുമെന്നതിനെക്കുറിച്ച് ചര്‍ച്ചകള്‍ നടക്കുന്നതായി ദേവസ്വം ബോര്‍ഡംഗം അജയ് തറയില്‍ പറഞ്ഞു. ഇതിനായി 99 കോടി രൂപയുടെ കേന്ദ്രഫണ്ട് ഉപയോഗിക്കും.
എരുമേലിയില്‍ രണ്ട് ബൈപ്പാസ് വരുന്നതോടെ പേട്ടതുളളല്‍ പാതയെ വാഹനവിമുക്തമാക്കാനാകുമെന്നും അദ്ദേഹം പറഞ്ഞു. മണ്ഡല - മകരവിളക്കു മഹോത്സവത്തിനു മുന്നോടിയായി എരുമേലിയിലെ ക്രമീകരണങ്ങള്‍ വിലയിരുത്താന്‍ എത്തിയതായിരുന്നു അദ്ദേഹം.
എരുമേലിയില്‍ ഹൈടെക് ഹോസ്പിറ്റല്‍ സംവിധാനം ആലോചനയിലുണ്ടെന്നും ഇതിനായി ഹൗസിങ് ബോര്‍ഡിന്റെ ഏഴേക്കര്‍ സ്ഥലം ആവശ്യപ്പെട്ടിട്ടുണ്ടെന്നും അജയ് തറയില്‍ പറഞ്ഞു. ഇത് ലഭിച്ചാല്‍ ദേവസ്വം ബോര്‍ഡ് സ്‌ക്കൂള്‍ മാറ്റി നിലവിലെ സ്‌കൂള്‍ ഇരിക്കുന്ന പ്രദേശത്ത് ആശുപത്രി പണിയുവാനാണ് ഉദ്ദേശ്യമെന്നും അദ്ദേഹം പറഞ്ഞു.
എരുമേലി - നിലയ്ക്കല്‍ - പമ്പ കൂട്ടിച്ചേര്‍ത്ത് ടൂറിസം ലിങ്ക് ഉണ്ടാക്കാന്‍ ടൂറിസം മന്ത്രിക്കു നിവേദനം നല്‍കി. എരുമേലിയിലെ വലിയതോട് ശുചീകരിക്കും. വലിയതോടിന് സമീപത്തെ ഷവറുകള്‍ നവീകരിക്കും. തീര്‍ഥാടകര്‍ക്ക് ഏറെ പ്രയോജനം ലഭിക്കുന്ന ശബരി റെയില്‍വേ യാഥാര്‍ത്ഥ്യമാക്കുവാന്‍ ജനകീയ പ്രതിഷേധം ആരംഭിക്കും.
എരുമേലി വലിയമ്പലം ചെമ്പോല പതിച്ച് കൊടിമരം സ്വര്‍ണ്ണം പൂശുമെന്നും അജയ് തറയില്‍ പറഞ്ഞു.
ദേവസ്വം കമ്മീഷണര്‍ രാമരാജപ്രേമപ്രസാദ്, എക്‌സിക്യൂട്ടീവ് എന്‍ജിനീയര്‍ അജിത് കുമാര്‍, അഡ്മിനിസ്‌ട്രേറ്റീവ് ഓഫീസര്‍ പി.എന്‍ ശ്രീകുമാര്‍ എന്നിവര്‍ അദ്ദേഹത്തോടൊപ്പം ഉണ്ടായിരുന്നു.