കളമശ്ശേരി: ഏകീകൃത സിവില്‍ നിയമത്തെച്ചൊല്ലി ഇപ്പോള്‍ ഉയര്‍ന്നിരിക്കുന്ന വാദങ്ങള്‍ ബാലിശമാണെന്നും, ഇന്ത്യന്‍ ഭരണഘടന രാജ്യത്തെ പൗരന്മാര്‍ക്കു നല്‍കുന്ന വിശ്വാസ സ്വാതന്ത്ര്യത്തെ അത് ഹനിക്കുമെന്നും എസ്.കെ.എസ്.എസ്.എഫ് കളമശ്ശേരി മേഖലാ ഹിദായ കോണ്‍ഫറന്‍സിലെ സെമിനാര്‍ അഭിപ്രായപ്പെട്ടു.
ഓരോ മതങ്ങള്‍ക്കും അവയുടെ കര്‍ത്തൃത്വത്തെ കുറിക്കുന്ന വിശ്വാസസംഹിതകളും നിയമവ്യാഖ്യാനങ്ങളും ഉണ്ട്. അതിന്മേല്‍ ഭരണകൂടം തടസ്സങ്ങള്‍ സൃഷ്ടിക്കുകയെന്നത് ആശാസ്യമല്ല എന്നും സെമിനാര്‍ അഭിപ്രായപ്പെട്ടു.  പുന്നുരുന്നി കെ. കുഞ്ഞുമുഹമ്മദ് മുസ്‌ലിയാര്‍ ഉദ്ഘാടനം ചെയ്ത് വിഷയാവതരണം നടത്തി.  
മതേതര പരിസരത്തില്‍ ഏതെങ്കിലും മതത്തിന്റെ വ്യക്തിത്വത്തെ നിര്‍ണ്ണയിക്കുന്ന നിയമങ്ങളെ പൊതു സമാജത്തിന്റെ നിയമമായി പ്രയോഗവല്‍കരിക്കല്‍ അസംഭവ്യമാണെന്നും മുസ്‌ലിം മതനിയമങ്ങളളെ പുനര്‍നിര്‍മിക്കാന്‍ മനുഷ്യര്‍ അശക്തരാണെന്നും പുന്നുരുന്നി ഉസ്താദ് പറഞ്ഞു.
ഹിദായ സ്വാഗതസംഘം ചെയര്‍മാന്‍ കെ.എ സിദ്ദീഖ് അധ്യക്ഷനായിരുന്നു.  ടി.എ അഹമ്മദ് കബീര്‍ എം.എല്‍.എ ചര്‍ച്ചയ്ക്ക് നേതൃത്വം നല്‍കി.  മതത്തിന്റെ അസ്തിത്വത്തെ ചോദ്യം ചെയ്യുന്ന നിലയില്‍ ഏകീകൃത സിവില്‍ നിയമവാദങ്ങള്‍ വരാതിരിക്കാന്‍ നിയമ സാക്ഷരതയും ഖുര്‍ആനിക സാക്ഷരതയും സമുദായം ആര്‍ജ്ജിക്കണമെന്ന് എം.എല്‍.എ അഭിപ്രായപ്പെട്ടു.  
എസ്.കെ.എസ്.എസ്.എഫ് സംസ്ഥാന ജനറല്‍ സെക്രട്ടറി സത്താര്‍ പന്തല്ലൂര്‍ മോഡറേറ്ററായിരുന്നു. ഭരണഘടനയിലെ വളരെ അടിയന്തിരമായി നടപ്പാക്കേണ്ട നിര്‍ദേശകതത്വങ്ങളെ കുറിച്ച് ആലോചിക്കുന്നതിനു പകരം രാജ്യത്തെ അരക്ഷിതാവസ്ഥയിലേക്കു തള്ളിവിടുന്ന ഏകീകൃത സിവില്‍കോഡ് വാദം തീര്‍ത്തും അസംബന്ധമാണെന്നും അത്തരം നീക്കങ്ങളെ ഈ സമൂഹം ഒറ്റക്കെട്ടായി പ്രതിരോധിക്കുമെന്നും സത്താര്‍ പന്തല്ലൂര്‍  പറഞ്ഞു.
ജില്ലാ ഖുര്‍ആന്‍ സ്റ്റഡി സെന്റര്‍ പ്രസിഡന്റ് എം.എം അബൂബക്കര്‍ ഫൈസി, എസ്.വൈ.എസ് ജില്ലാ ജനറല്‍ സെക്രട്ടറി സി.എം അബ്ദുറഹ്മാന്‍കുട്ടി, കളമശ്ശേരി വാഫി കോളേജ് പ്രിന്‍സിപ്പല്‍ ജഅ്ഫര്‍ ഷെരീഫ് വാഫി, എസ്.കെ.എസ്.എസ്.എഫ് ജില്ലാ ജനറല്‍ സെക്രട്ടറി പി.എം ഫൈസല്‍, കോമ്പാറ വഫിയ്യ കോളേജ് വര്‍ക്കിംഗ് ചെയര്‍മാന്‍ ഹുസൈന്‍ ഹാജി,  ഖുര്‍ആന്‍ സ്റ്റഡി സെന്റര്‍ ജില്ലാ ജനറല്‍ സെക്രട്ടറി എം.ബി. മുഹമ്മദ്, ട്രഷറര്‍ അബ്ദുസ്സലാം ഹാജി,  എസ്.കെ.എസ്.എസ്.എഫ് മേഖലാ പ്രസിഡന്റ് പി.എച്ച് അജാസ്, ജനറല്‍ സെക്രട്ടറി നൗഫല്‍ തീനാടന്‍ തുടങ്ങിയവര്‍ പങ്കെടുത്തു. സ്വാഗതസംഘം കണ്‍വീനര്‍  സൈനുദ്ദീന്‍ വാഫി സ്വാഗതവും ട്രഷറര്‍ അബ്ദുറസാഖ് നന്ദിയും പറഞ്ഞു.