തിരുവനന്തപുരം: സഹകരണ സ്ഥാപനങ്ങളിലെ നിക്ഷേപത്തിന്റെ കാര്യത്തില്‍ ആര്‍ക്കും ആശങ്ക വേണ്ടെന്ന് മന്ത്രി എ.സി. മൊയ്തീന്‍. നിക്ഷേപകര്‍ക്ക് സര്‍ക്കാര്‍ ഉറപ്പ് നല്‍കും. എല്ലാ വിഷയത്തിലും മന്ത്രിസഭാ യോഗത്തില്‍ തീരുമാനമെടുക്കുമെന്നും മന്ത്രി പറഞ്ഞു. നോട്ട് മാറ്റത്തെ തുടര്‍ന്ന് സഹകരണ സ്ഥാപനങ്ങളുടെ കീഴിലുള്ള നിത്യോപയോഗ വില്‍പന കേന്ദ്രങ്ങള്‍ പ്രസിസന്ധിയിലാണ്.
കേരളത്തിലെ സഹകരണ സംഘങ്ങള്‍ വിപണിയില്‍ ഇടപെടലുകള്‍ നടത്തുന്നുണ്ട്. ഇത് അവസാനിപ്പിക്കാന്‍ കഴിയില്ല. സഹകരണ സംഘങ്ങള്‍ നടത്തുന്ന ഇടപെടലുകള്‍ അവസാനിപ്പിച്ചാല്‍ വലിയ പ്രശ്‌നമുണ്ടാകുമെന്നും അദ്ദേഹം ചൂണ്ടിക്കാട്ടി. ഇതിനായി ജില്ലാ ബാങ്കുവഴി പണം കൈമാറാന്‍ ശ്രമിക്കും.
സ്വകാര്യ സ്ഥാപനങ്ങളുമായി ചര്‍ച്ച ചെയ്ത് ധാരണയിലെത്തിയാല്‍ പണം പിന്നീട് നല്‍കാനുള്ള ധാരണയിലൂടെ സാധനങ്ങള്‍ എത്തിക്കാനാവും. വി.എഫ്.പി.സി.കെ അടക്കമുള്ള സര്‍ക്കാര്‍ സ്ഥാപനങ്ങളുടെ കാര്യത്തില്‍ സര്‍ക്കാര്‍ നേരിട്ട് അടിയന്തര നടപടി സ്വീകരിക്കുമെന്നും അദ്ദേഹം വ്യക്തമാക്കി.