കോഴിക്കോട്: കുറ്റിച്ചിറ ഗവ. ഹയര്‍ സെക്കന്‍ഡറി സ്‌കൂളിലെ 20 വിദ്യാര്‍ഥികള്‍ വ്യാഴാഴ്ച തിരുവനന്തപുരത്തെ ശാസ്ത്ര-സാങ്കേതിക സ്ഥാപനങ്ങള്‍ സന്ദര്‍ശിക്കും.
കോഴിക്കോട് സൗത്ത് നിയോജക മണ്ഡലത്തില്‍ ഡോ. എം.കെ മുനീര്‍ എം.എല്‍.എ നടപ്പിലാക്കുന്ന സമഗ്രവിദ്യാഭ്യാസ വികസന പദ്ധതി 'മെലഡി'യിലൂടെയാണ് ഇതിന് അവസരം ലഭിച്ചത്. തിരഞ്ഞെടുത്ത 20 വിദ്യാര്‍ഥികളാണ് തുമ്പയിലെ ഐ.എസ്.ആര്‍.ഒ, സയന്‍സ് ആന്‍ഡ് ടെക്‌നോളജി മ്യൂസിയം, നാഷനല്‍ സെന്റര്‍ ഫോര്‍ എര്‍ത്ത് ആന്‍ഡ് സയന്‍സ് സ്റ്റഡീസ് തുടങ്ങിയ ശാസ്ത്ര സാങ്കേതിക സ്ഥാപനങ്ങള്‍ സന്ദര്‍ശിക്കുന്നതെന്ന് ഡോ. എം.കെ മുനീര്‍ വാര്‍ത്താസമ്മേളനത്തില്‍ അറിയിച്ചു.
'മെലഡി' പദ്ധതി പ്രകാരം മണ്ഡലത്തിലെ മൂന്നു സ്‌കൂളുകളെ മികവിന്റെ കേന്ദ്രങ്ങളായി വികസിപ്പിക്കുന്നതിന് പദ്ധതി തയാറാക്കിയിട്ടുണ്ടെന്നും മുനീര്‍ പറഞ്ഞു. ഫൈസല്‍ ഷബാന ഫൗണ്ടേഷന്റെ സഹായത്തോടെയാണ് പദ്ധതി തയാറാക്കുന്നത്. ആദ്യഘട്ടമായി മീഞ്ചന്ത ഗവ. വൊക്കേഷനല്‍ ഹയര്‍ സെക്കന്‍ഡറി സ്‌കൂളിലാണ് നടപ്പാക്കുക. തുടര്‍ന്ന് കല്ലായി ഗവ. ഗണപത് ഹയര്‍ സെക്കന്‍ഡറിയിലും ഗവ. മോഡല്‍ ഹയര്‍ സെക്കന്‍ഡറി സ്‌കൂളിലും പദ്ധതി നടപ്പാക്കുമെന്നും മുനീര്‍ അറിയിച്ചു.