ഇരിട്ടി: ജില്ലാ പഞ്ചായത്ത് 2016-17 വര്‍ഷത്തെ പദ്ധതിയില്‍ ഉള്‍പ്പെടുത്തി നടപ്പാക്കുന്ന ആദിവാസി ഗര്‍ഭിണികള്‍ക്കായുളള വൈദ്യപരിശോധന-പോഷകാഹാര പദ്ധതിയുടെ ഉദ്ഘാടനം ഇരിട്ടി താലൂക്ക് ആശുപത്രിയില്‍ ഇന്നു രാവിലെ 9.30നു ജില്ലാ പഞ്ചായത്ത് പ്രസിഡന്റ് കെ.വി സുമേഷ് നിര്‍വഹിക്കും.
ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാന്റിങ്ങ് കമ്മിറ്റി ചെയര്‍മാന്‍ കെ.പി ജയബാലന്‍ അധ്യക്ഷനാവും. കലക്ടര്‍ മിര്‍ മുഹമ്മദലി മുഖ്യാതിഥിയാകും. ജില്ലാ മെഡിക്കല്‍ ഓഫിസര്‍ (ആരോഗ്യം) പദ്ധതി വിശദീകരിക്കും.
ആദിവാസികളിലെ പോഷകാഹാരക്കുറവു പരിഹരിക്കുക, ഗര്‍ഭകാല പരിശോധനയും തുടര്‍ ചികിത്സയും ലഭ്യമാക്കുക, ഗര്‍ഭിണികളായ ആദിവാസികളുടെ മരണ നിരക്കു കുറക്കുക, കുട്ടികളിലെ തൂക്കക്കുറവു പരിഹരിക്കുക, നവജാത ശിശുക്കളിലെ മരണനിരക്കു കുറക്കുക, ആദിവാസികളെ ദേശീയ മുഖ്യധാരയിലേക്കു കൊണ്ടുവരിക എന്നീ ലക്ഷ്യങ്ങള്‍ മുന്‍നിര്‍ത്തി ജില്ലാ പഞ്ചായത്ത് നടപ്പാക്കുന്ന പദ്ധതിക്ക് ഈ സാമ്പത്തിക വര്‍ഷം 10 ലക്ഷം രൂപ വകയിരുത്തിയിട്ടുണ്ട്. ഇരിട്ടി, കീഴ്പ്പളളി, ചിറ്റാരിപ്പറമ്പ് എന്നീ ബ്ലോക്കുകളിലെ ആരോഗ്യ സ്ഥാപനങ്ങളിലൂടെയാണു പദ്ധതി നടപ്പാക്കുക.
നവംബര്‍ മുതല്‍ മാര്‍ച്ചു വരെയുള്ള അഞ്ചുമാസം ഇരുനൂറോളം വരുന്ന ആദിവാസി ഗര്‍ഭിണികള്‍ക്കു പദ്ധതിയുടെ പ്രയോജനം ലഭിക്കും. എക്‌സറേ, സ്‌കാനിങ്ങ്, രക്തപരിശോധന, മരുന്നു വിതരണം, തുടര്‍ചികിത്സ എന്നിവയും ഉറപ്പാക്കും.