ബാങ്കോക്: പാകിസ്താനെ തകര്‍ത്ത് ഇന്ത്യന്‍ വനിതാ ക്രിക്കറ്റ് ടീം എഷ്യ കപ്പ് ടി20 കിരീടം സ്വന്തമാക്കി. 17 റണ്‍സിനാണ് ഇന്ത്യയുടെ വിജയം. ഇന്ത്യന്‍ വനിതകളുടെ ആറാം ഏഷ്യന്‍ കിരീടമാണിത്. ആദ്യം ബാറ്റു ചെയ്ത ഇന്ത്യ 20 ഓവറില്‍ അഞ്ചു വിക്കറ്റ് നഷ്ടത്തില്‍ 121 റണ്‍സെടുത്തപ്പോള്‍ പാകിസ്താന്റെ പോരാട്ടം 20 ഓവറില്‍ ആറു വിക്കറ്റ് നഷ്ടത്തില്‍ 104 റണ്‍സില്‍ അവസാനിച്ചു.
73 റണ്‍സ് നേടി പുറത്താകാതെ നിന്ന ഓപണര്‍ മിതാലി രാജിന്റെ ഒറ്റയാള്‍ പ്രകടനമാണ് ഇന്ത്യക്കു പൊരുതാവുന്ന സ്‌കോര്‍ സമ്മാനിച്ചത്. മധ്യനിരയില്‍ ജുലന്‍ ഗോസ്വാമി (17) യാണ് രണ്ടക്കം കടന്ന മറ്റൊരു ഇന്ത്യന്‍ താരം.
ജയം തേടിയിറങ്ങിയ പാകിസ്താനായി ബിസ്മ മറൂഫ് (25), ജാവരിയ ഖാന്‍ (22) എന്നിവര്‍ മാത്രം പൊരുതി. ഇന്ത്യക്കായി ഏക്ത ബിഷ്ട് രണ്ടു വിക്കറ്റ് നേടി.
കളിയിലേയും പരമ്പരയുടേയും താരമായി മിതാലി രാജ് തിരഞ്ഞെടുക്കപ്പെട്ടു.