ന്യൂഡല്‍ഹി: നഷ്ടത്തില്‍ പ്രവര്‍ത്തിക്കുന്ന കെ.എസ്.ആര്‍.ടി.സിക്ക് ഇനിയും കൂടുതല്‍ തുക അനുവദിക്കാനാവില്ലെന്ന് ധനമന്ത്രി ഡോ. തോമസ് ഐസക്. കെ.എസ്.ആര്‍.ടി.സിക്ക് പരമാവധി സഹായം സര്‍ക്കാര്‍ നല്‍കിയിട്ടുണ്ട്. ഇനിയും കൂടുതല്‍ തുക നല്‍കുക എന്നത് പ്രായോഗികമല്ല. ലാഭവും നഷ്ടവും ഇല്ലാതെ പ്രവര്‍ത്തിക്കാന്‍ കെ.എസ്.ആര്‍.ടി.സി കര്‍മപദ്ധതി തയ്യാറാക്കണമെന്നും മന്ത്രി പറഞ്ഞു.
ജി.എസ്.ടി കൗണ്‍സില്‍ യോഗത്തില്‍ പങ്കെടുക്കാന്‍ ഡല്‍ഹിയിലെത്തിയ മന്ത്രി മാധ്യമപ്രവര്‍ത്തകരുമായി സംസാരിക്കുകയായിരുന്നു. കെ.എസ്.ആര്‍.ടി.സിക്ക് മാസം തോറും ഉണ്ടാകുന്ന നഷ്ടം നികത്താന്‍ സര്‍ക്കാരിന് സാധിക്കില്ല.
വായ്പ എടുത്ത് എക്കാലവും മുന്നോട്ടുപോകാമെന്ന സമീപനം ശരിയല്ല. ഈ സമീപനം വലിയ പ്രതിസന്ധിയിലേക്കായിരിക്കും സ്ഥാപനത്തെ എത്തിക്കുക. എന്നാല്‍, പുതിയ സി.എന്‍.ജി ബസുകള്‍ വാങ്ങാന്‍ സംസ്ഥാന സര്‍ക്കാര്‍ സഹായം നല്‍കും.  ജീവനക്കാരുടെ ശമ്പളവും വിരമിച്ചവരുടെ പെന്‍ഷനും അടുത്ത ചൊവ്വ, ബുധന്‍ ദിവസങ്ങളിലായി നല്‍കുമെന്നും അദ്ദേഹം വ്യക്തമാക്കി. വായ്പയുടെ പലിശ കുറയ്ക്കുന്നത് അടക്കമുള്ള സഹായങ്ങള്‍ നല്‍കാന്‍ സര്‍ക്കാര്‍ തയ്യാറാണ്. കെ.എസ്.ആര്‍.ടി.സിയെ പുനരുദ്ധരിക്കാന്‍ നടപടികള്‍ സ്വീകരിക്കണമെന്നും അദ്ദേഹം പറഞ്ഞു.