പാലക്കാട്: ജില്ലയില്‍ എയര്‍ഹോണ്‍ മുഴക്കി മരണപ്പാച്ചില്‍ നടത്തുന്ന ബസുകള്‍ക്കെതിരേ കര്‍ശന നടപടിയുമായി മോട്ടോര്‍ വാഹനവകുപ്പ്. വേഗപ്പൂട്ട് അഴിച്ചുമാറ്റിയ മുഴുവന്‍ ബസുകള്‍ക്കെതിരേയും കര്‍ശന നടപടി സ്വീകരിക്കാനാണ് മോട്ടോര്‍ വാഹനവകുപ്പിന്റെ തീരുമാനം. വാര്‍ഷിക പരിശോധന സമയത്ത് വേഗപ്പൂട്ട് ഘടിപ്പിച്ച് ക്ലിയറന്‍സ് നേടുകയും തുടര്‍ന്നു അത് അഴിച്ചുമാറ്റി സര്‍വീസ് നടത്തുകയുമാണ് ബസുകള്‍ ചെയ്യുന്നത്. ഇതുകൊണ്ടുതന്നെ അപകടങ്ങള്‍ വ്യാപകമാകുന്നതും മോട്ടോര്‍ വാഹനവകുപ്പ് ഗൗരവമായി കാണുന്നുണ്ട്. വാഹനങ്ങളില്‍ ഘടിപ്പിക്കുന്നതിനു നിരോധനമുള്ള എയര്‍ഹോണുകളാണ് ബസുകളില്‍ ഘടിപ്പിച്ചിട്ടുള്ളത്. ഇന്‍സ്‌പെക്ഷന്‍ സമയത്ത് അഴിച്ചുമാറ്റുന്ന ഇവ പിന്നീടാണ് ഘടിപ്പിക്കുന്നത്.
കടുത്ത ശബ്ദ മലിനീകരണം ഉണ്ടാക്കുന്ന ഹോണുകളാണ് ഇവ. നല്ല ശബ്ദത്തില്‍ ഹോണ്‍ മുഴക്കി ചെറുവാഹനങ്ങളെയും ഇരുചക്രവാഹനങ്ങളെയും യാത്രക്കാരെയുമെല്ലാം ഭയപ്പെടുത്തിയാണ് മേല്‍പറഞ്ഞ ബസുകളുടെ അപകടകരമായ മരണപ്പാച്ചില്‍. പ്രധാന പാതകളിലെല്ലാം ഇതു പതിവായിരിക്കയാണ്.
വാഹനത്തിരക്കും ജനത്തിരക്കും ഏറെയുള്ള പാതകളില്‍ ഇങ്ങനെ മരണപ്പാച്ചിലും ഹോണും മുഴക്കി ബസുകളുടെ ഓട്ടത്തിനെതിരേ വ്യാപകമായി പരാതിയും ഉയര്‍ന്നിട്ടുണ്ട്. കെ.എസ്.ആര്‍.ടി ബസുകള്‍ പോലും വേഗപൂട്ട് അഴിച്ചു മാറ്റിയാണ് ഓടുന്നതെന്ന് മോട്ടോര്‍ വാഹനവകുപ്പ് അധികൃതര്‍ പറയുന്നു. വളരെ പഴക്കമുള്ള ബസുകള്‍ പോലും സര്‍വീസ് നടത്തുന്ന സാഹചര്യത്തില്‍ ഇത്തരം വാഹനങ്ങള്‍ക്കെതിരെയും നടപടിയ്‌ക്കൊരുങ്ങുകയാണ് അധികൃതര്‍. ബസുകളുടെ പരിശോധനയ്‌ക്കൊപ്പം ഹെല്‍മറ്റില്ലാതെയും മൂന്നുപേരെ ഇരുത്തിയും മറ്റും ബൈക്കില്‍ പോകുന്നത് ഉള്‍പ്പെടെയുള്ളവയും ഇനി പരിശോധിക്കും. വാഹനങ്ങള്‍ തടഞ്ഞു നിര്‍ത്തിയുള്ള പരിശോധനയ്ക്കു പകരം ഫോട്ടോയെടുത്ത് പിഴ വിവരം വാഹന ഉടമയെ അറിയിക്കും.
പിഴ അടച്ചില്ലെങ്കില്‍ നടപടിയുണ്ടാകും. ട്രാന്‍സ്‌പോര്‍ട്ട് കമ്മീഷണറുടെ നിര്‍ദേശപ്രകാരമാണ് പരിശോധന നടത്തുന്നത്. ഇലക്ട്രിക് ഹോണുകളാണ് വാഹനകളില്‍ ഉപയോഗിക്കുന്നത്. എന്നാല്‍ നഗരപരിധിയില്‍ പഴയകാലത്തെ ബള്‍ബ് ഹോണ്‍ ഉപയോഗിക്കണമെന്ന നിര്‍ദേശവും മോട്ടോര്‍ വാഹനവകുപ്പ് അധികൃതര്‍ മുന്നോട്ടു വച്ചിട്ടുണ്ട്.