കുഴല്‍മന്ദം: കുഴല്‍മന്ദം മേഖലയിലെ ഷട്ടറുകള്‍ ഉപയോഗശൂന്യം. ഇതോടെ മലമ്പുഴ ഇടതു കനാലിന്റെ വാലറ്റ പ്രദേശത്തെ കൃഷിയിടത്തിലേക്കു വെള്ളമെത്തുന്നില്ല. കര്‍ഷകര്‍ ആശങ്കയില്‍. കുത്തനുര്‍, തോലന്നൂര്‍, മണിയംപാറ ഭാഗങ്ങളിലാണ് വെള്ളമെത്താതെ കൃഷി ഉണക്കുഭീഷണി നേരിടുന്നത്.
കാല്‍നൂറ്റാണ്ട് പഴക്കമുള്ള ഷട്ടറുകളാണ് മേഖലയില്‍ മിക്കതും. ഷട്ടറുകളുടെ പ്രവര്‍ത്തനം നിലച്ചതുമൂലം ചിലയിടങ്ങളില്‍ വെള്ളം തുറന്നുവിടാന്‍ കഴിയാത്ത അവസ്ഥയും.
എന്നാല്‍ മറ്റു ചിലയിടങ്ങളില്‍ ഷട്ടര്‍ തുറന്നുകിടക്കുന്നതിനാല്‍ വെള്ളം യഥേഷ്ടം ഒഴുകി പോകുന്നുതുമൂലം വാലറ്റ പ്രദേശങ്ങളിലേക്കു വെള്ളം കിട്ടാത്ത അവസ്ഥയും വന്നിരിക്കുകയാണ്.
താല്‍ക്കാലികമായി മണല്‍, മണ്ണ് ചാക്കു നിറച്ചു അമിത ജലത്തിന്റെ ഒഴുക്കു നിയന്ത്രിക്കുകയാണ് കര്‍ഷകര്‍.
ഇതിനുപുറമെ പലയിടത്തും കാഡ കനാല്‍ പൊളിഞ്ഞു കിടക്കുന്നതുമൂലം കര്‍ഷകരും ദുരിതത്തിലാണ്.