ന്യൂഡല്‍ഹി: സംസ്ഥാനത്തെ പാസഞ്ചര്‍ ബോട്ടുകള്‍ സൗരോര്‍ജം ഉപയോഗിച്ചു പ്രവര്‍ത്തിപ്പിക്കുന്നതിനുള്ള പദ്ധതിയുടെ രൂപരേഖ കേന്ദ്രസര്‍ക്കാരിനു മുമ്പാകെ സമര്‍പ്പിച്ചു. കേന്ദ്ര പാരമ്പര്യേതര ഊര്‍ജവകുപ്പ് സഹമന്ത്രി പിയൂഷ് ഗോയലുമായി നടത്തിയ കൂടിക്കാഴ്ചയില്‍ സംസ്ഥാന ഗതാഗത മന്ത്രി എ.കെ ശശീന്ദ്രന്‍ ആണ് പദ്ധതിയുടെ വിശദാംശങ്ങള്‍ കേന്ദ്രത്തിനു സമര്‍പ്പിച്ചത്.
അടുത്തമാസം 12നു നടക്കുന്ന സംസ്ഥാന ഗതാഗതവകുപ്പിനു കീഴിലുള്ള സോളാര്‍ ബോട്ടിന്റെ ഉദ്ഘാടന ചടങ്ങിനു കേന്ദ്രമന്ത്രിയെ ക്ഷണിക്കാനായി എത്തിയതായിരുന്നു ശശീന്ദ്രന്‍.
ഇന്ത്യയില്‍ തന്നെ ആദ്യത്തെ സോളാര്‍ ബോട്ടില്‍ 75 യാത്രക്കാര്‍ക്ക് ഒരേസമയം യാത്രചെയ്യാം. വൈക്കം മുതല്‍ തവണക്കടവ് വരെയാണ് ബോട്ട് ആദ്യഘട്ടം സര്‍വീസ് നടത്തുക.
സൗരോര്‍ജം ഉപയോഗിക്കുന്നതിലൂടെ വായുമലീനികരണം കുറയ്ക്കാന്‍ കഴിയുമെന്നും കേരളത്തിന്റെ പദ്ധതിയില്‍ പ്രതീക്ഷയുണ്ടെന്നും കേന്ദ്രമന്ത്രി പറഞ്ഞു. കേന്ദ്രമന്ത്രിയുമായുള്ള കൂടിക്കാഴ്ച്ചയില്‍ ലക്ഷദീപ് എം.പി മുഹമ്മദ് ഫൈസലും പങ്കെടുത്തു.