ന്യൂഡല്‍ഹി: യു.പി.എ സര്‍ക്കാര്‍ വിവാദമായ യു.എ.പി.എ നിയമം കൊണ്ടുവന്നത് തന്നെ തെറ്റായിപ്പോയെന്ന് മുസ്‌ലിം ലീഗ് ദേശീയ വക്താവ് ഇ.ടി മുഹമ്മദ് ബഷീര്‍ പറഞ്ഞു. തങ്ങള്‍ കൂടി അംഗമായ സര്‍ക്കാരാണ് യു.എ.പി.എ കൊണ്ടുവന്നത് എന്ന കാരണം കൊണ്ട് ആ വിവാദനിയമത്തെ ന്യായീകരിക്കേണ്ട ആവശ്യമില്ല.

യു.എ.പി.എയെ മുസ്‌ലിം ലീഗ് ഒരിക്കലും അംഗീകരിക്കില്ല. ബി.ജെ.പിക്കാരോ സി.പി.എമ്മുകാരോ ആയ പ്രതികളായാലും ശരി ആര്‍ക്കെതിരെയും യു.എ.പി.എ ചുമത്തരുത് എന്നാണ് പാര്‍ട്ടിയുടെ നിലപാടെന്നും അദ്ദേഹം പറഞ്ഞു.

ഡല്‍ഹിയില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. കേരളത്തില്‍ പ്രവര്‍ത്തിക്കുകയും കേന്ദ്രത്തിന്റെ നിര്‍ദേശങ്ങള്‍ സ്വീകരിക്കുകയും ചെയ്യുന്ന ചില ഉദ്യോഗസ്ഥരുണ്ട്. അവര്‍ ഇവിടെ ഒരു പൊതു അജണ്ടയുണ്ടാക്കിയിട്ടുണ്ടോയെന്നു സംശയിക്കത്തക്ക വിധത്തിലാണ് കാര്യങ്ങള്‍ നീങ്ങുന്നത്.

കേരളാ പൊലിസ് പക്ഷപാതപരമായാണ് പെരുമാറുന്നത്. ഇപ്പോഴത്തെ ഡി.ജി.പിയെ മാറ്റണമെന്ന് അഭിപ്രായമില്ല. സമീപനമാണ് മാറേണ്ടതെന്നും അദ്ദേഹം പറഞ്ഞു. മുജാഹിദ് സംഘടനകള്‍ ലയിച്ച സാഹചര്യത്തില്‍ സുന്നി ഐക്യം ആവശ്യമാണെന്നും അതുപോലെ പ്രധാന്യമാണ് ദലിത് മുസ്‌ലിം ഐക്യത്തിനെന്നും അദ്ദേഹം കൂട്ടിച്ചേര്‍ത്തു.