തലശ്ശേരി: കേന്ദ്ര സര്‍ക്കാറിന്റെ വിവിധോദ്ദേശ്യ വികസന പദ്ധതിയായ നീതി ആയോഗിനു കീഴിലുള്ള അടല്‍ ഇന്നവേഷന്‍ മിഷന്‍ നടപ്പാക്കാന്‍ തലശ്ശേരി അമൃത വിദ്യാലയത്തെ തെരഞ്ഞെടുത്തു.
പദ്ധതിയുടെ ഭാഗമായി അടല്‍ ടിങ്കറിങ് ലാബ് ഉടന്‍ വിദ്യാലയത്തില്‍ സ്ഥാപിക്കും. സര്‍ക്കാര്‍, എയ്ഡഡ്, അണ്‍ എയ്ഡഡ് മേഖലകളില്‍ നിന്നായി ജില്ലയില്‍ നിന്നു തെരഞ്ഞെടുത്ത ഏക വിദ്യാലയമാണ് തലശ്ശേരി അമൃത വിദ്യാലയമെന്ന് പ്രിന്‍സിപ്പല്‍ ബ്രഹ്മചാരിണി ഷീലയും ഡയറക്ടര്‍ ഉഷയും വാര്‍ത്താസമ്മേളനത്തില്‍ അറിയിച്ചു.
ദേശീയതലത്തില്‍ 14,000ത്തോളം വിദ്യാലയങ്ങളെ ഉള്‍ക്കൊള്ളിച്ചു നടത്തിയ വിവിധ ടെസ്റ്റുകളില്‍ നിന്നാണ് ദേശീയതലത്തില്‍ 257 സ്‌കൂളുകളെയും കേരളത്തില്‍ 18 വിദ്യാലയങ്ങളെയും അടല്‍ ടിങ്കറിങ് ലാബ് സ്ഥാപിക്കാന്‍ തെരഞ്ഞെടുത്തത്. 10 വര്‍ഷം കൊണ്ട് 10 ലക്ഷം ശാസ്ത്രജ്ഞരെ വാര്‍ത്തെടുക്കാനുള്ള പദ്ധതിയുടെ ഭാഗമായാണിത്.
ആദ്യഘട്ടമെന്ന നിലയില്‍ 12 ലക്ഷം രൂപ കേന്ദ്ര സര്‍ക്കാര്‍ നല്‍കും. ജില്ലയിലെ മറ്റു സ്‌കൂളുകളിലെ ശാസ്ത്ര പ്രതിഭകള്‍ക്കും അമൃത വിദ്യാലത്തിലെ ടിങ്കറിങ് ലാബ് പ്രയോജനപ്പെടുത്തി ഗവേഷണങ്ങള്‍ നടത്താം. വാര്‍ത്താസമ്മേളനത്തില്‍ മേജര്‍ ഗോവിന്ദന്‍, ടി.എം ദിലീപ് കുമാര്‍, ജി സുമി പങ്കെടുത്തു.