കൂത്തുപറമ്പ്: ചിട്ടിയില്‍ അടച്ച സംഖ്യയ്ക്ക് പകരമായി വണ്ടി ചെക്ക് നല്‍കി വിശ്വാസ വഞ്ചന നടത്തിയെന്ന കേസില്‍ മാരുതി ചിറ്റ്‌സ് എം.ഡിയെ കോടതി റിമാന്‍ഡ് ചെയ്തു. കല്‍പറ്റയിലെ മാരുതി ചിറ്റ്‌സ് എം.ഡി ഇ.കെ സുശീല്‍ കുമാറി(48)നെയാണ് കൂത്തുപറമ്പ് ജുഡീഷ്യല്‍ ഒന്നാം ക്ലാസു മജിസ്‌ട്രേറ്റ് കോടതി റിമാന്‍ഡു ചെയ്തത്. നെടുംപൊയില്‍ തെറ്റുവഴിയിലെ മണപ്പാട്ടി വീട്ടില്‍ പ്രമോദിന്റെ പരാതി പ്രകാരമുള്ള കേസിലാണ് നടപടി. സമാനമായ മറ്റൊരു കേസില്‍ കണ്ണൂര്‍ സെന്‍ട്രല്‍ ജയിലില്‍ റിമാന്‍ഡില്‍ കഴിയുന്നതിനാല്‍ കൂത്തുപറമ്പ് ജുഡീഷല്‍ ഒന്നാം ക്ലാസ് മജിസ്‌ട്രേട്ടു കോടതിയുടെ അനുമതിയോടെ പേരാവൂര്‍ എസ്.ഐ പി.കെ ദാസ് കഴിഞ്ഞ ദിവസം കണ്ണൂര്‍ സെന്‍ട്രല്‍ ജയിലിലെത്തി സുശീല്‍ കുമാറിന്റെ അറസ്റ്റു രേഖപ്പെടുത്തിയിരുന്നു. പ്രതിയെ റിമാന്‍ഡു ചെയ്യണമെന്ന് ആവശ്യപ്പെട്ട് പൊലിസ് കോടതിയില്‍ അപേക്ഷ നല്‍കിയതിനെ തുടര്‍ന്നാണ് ഇന്നലെ രാവിലെ കോടതിയില്‍ ഹാജരാക്കിയത്.