പയ്യോളി: അരക്ക് താഴെ സ്വാധീനം നഷ്ടപ്പെട്ടിട്ടും ഈര്‍ക്കിളുകള്‍ കൊണ്ട് വിസ്മയം തീര്‍ക്കുകയാണ് മേപ്പയില്‍ സ്വദേശി രമേശന്‍. ഇരിങ്ങല്‍ സര്‍ഗാലയയില്‍ അന്താരാഷ്ട്ര കരകൗശല മേളയിലെ 27ാം നമ്പര്‍ സ്റ്റാളിലെത്തുന്ന സന്ദര്‍ശകരാണ് രമേശന്റെ കരവിരുതില്‍ അത്ഭുതപ്പെടുന്നത്. ഈര്‍ക്കിളുകള്‍ കൊണ്ട് മാത്രം നിര്‍മിച്ച വസ്തുക്കള്‍ കണ്ടാല്‍ ഏതൊരാളെയും അത്ഭുതപ്പെടും. സ്വര്‍ണപണിക്കാരനായിരുന്ന രമേശന് 18 വര്‍ഷം മുന്‍പാണ് അരക്ക് താഴെ സ്വാധീനം നഷ്ടപ്പെട്ടത്. 42കാരനായ രമേശന്‍ അവിവാഹിതനാണ്. അച്ഛന്‍ നേരത്തെ മരണപ്പെട്ടു. 80 വയസുള്ള അമ്മയും തളര്‍ന്ന വീട്ടില്‍ കിടപ്പിലാണ്. പ്രയാസങ്ങള്‍ക്കിടയിലും തളരാത്ത മനസുമായിട്ടാണ് രമേശന്‍ വിസ്മയം തീര്‍ക്കുന്നത്. മൂത്തുപഴുത്ത ഇലയുടെ ഈര്‍ക്കിളെടുത്ത് പാകത്തിലാക്കിയാണ് ഉല്‍പന്നങ്ങള്‍ നിര്‍മിക്കുന്നത്. നിലവിളക്ക്, കിണ്ടി, തോണി, ഗോപുരം, കിളിക്കൂട് തുടങി നിരവധി ഉല്‍പന്നങ്ങള്‍ രമേശന്റെ ശേഖരത്തില്‍ ഉണ്ട്.
ഒരു വര്‍ഷം മുന്‍പ് ജ്യേഷ്ഠന്റെ മകളുടെ താല്‍പര്യപ്രകാരം, ആദ്യമായി ഈളുകള്‍
കൊണ്ട് സ്റ്റാര്‍ നിര്‍മിച്ച നല്‍കുകയായിരുന്നു, സ്‌കൂളില്‍ നിന്നും, ഇതിനു നല്ല പ്രതികരണം ലഭിച്ചതാണ് രമേശനെ ഈ രംഗത്തേക്ക് കൂടതല്‍ ആകര്‍ഷിക്കാന്‍ കാരണമായത്. ഈര്‍ക്കിളുകള്‍കൊണ്ടുള്ള പള്ളിമിനാരം നിര്‍മിക്കുന്ന ജോലിയിലാണ് ഇപ്പോള്‍ രമേശന്‍. 4 ദിവസംകൊണ്ട് മിനാരം മനോഹരമായി പൂര്‍ത്തിയാകുമെന്നാണ് രമേശന്‍ പറയുന്നത്. വടകര മേപ്പയില്‍ പച്ചക്കറി മുക്ക് സ്വദേശിയായ രമേശന് മാറ്റ് വരുമാന മാര്‍ഗങ്ങള് ഒന്നുമില്ല. വടകരയിലുള്ള വലിയ സുഹൃത്ത് വലയമാണ് രമേശന് തണലേകുന്നത്.