തിരുവനന്തപുരം: രാജ്‌മോഹന്‍ ഉണ്ണിത്താനെ കൈയേറ്റം ചെയ്യുകയും കാര്‍ തകര്‍ക്കുകയും ചെയ്ത സംഭവത്തില്‍ ആറു കോണ്‍ഗ്രസ് പ്രവര്‍ത്തകരെ സസ്‌പെന്‍ഡ് ചെയ്തു. കൊല്ലം ഡി.സി.സി പ്രസിഡന്റാണ് സസ്‌പെന്‍ഷന്‍ ഉത്തരവിട്ടത്.

എം.എസ് അജിത് കുമാര്‍,ആര്‍.എസ് ബേബി,ശങ്കരനാരായണന്‍,ബിനു മംഗലത്ത്,വിഷ്ണു വിജയന്‍,എസ്.പി അതുല്‍ എന്നിവരെയാണ് സസ്‌പെന്‍ഡ് ചെയ്തത്. ഇവരെല്ലാവരും കോണ്‍ഗ്രസിന്റെ വിവിധ ഘടകത്തിലെ ഭാരവാഹികളാണ്.

ഇന്ന് രാവിലെ കൊല്ലം ഡി.സി.സി ഓഫിസിനു മുന്‍പില്‍ വച്ചായിരുന്നു ഒരു കൂട്ടം കോണ്‍ഗ്രസ് പ്രവര്‍ത്തകര്‍ ഉണ്ണിത്താനെ കൈയേറ്റം ചെയ്യാന്‍ ശ്രമിച്ചത്. ഉണ്ണിത്താന്റെ കാറിനു നേരെ ചീമുട്ടയെറിയുകയും കാറിന്റെ ചില്ല് തല്ലിത്തകര്‍ക്കുകയും ചെയ്തു.

ഇന്ന് നടന്ന അനിഷ്ട സംഭവങ്ങള്‍ ഡി.സി.സി ഉപസമിതി അന്വേഷിക്കും. രണ്ട് ഡി.സി.സി ഭാരവാഹികള്‍ ഉള്‍പ്പെടുന്ന സമിതിയാണ് അന്വേഷിക്കുക. കോണ്‍ഗ്രസ് നേതൃത്വത്തെ രൂക്ഷമായി വിമര്‍ശിച്ച കെ. മുരളീധരന്റെ പ്രസ്താവനക്ക്് മറുപടി നല്‍കിയതോടെയാണ് ഉണ്ണിത്താനെതിരേ ആക്രമണമുണ്ടായത്. ഇതു സംബന്ധിച്ച ഗ്രൂപ്പ് പോര് കോണ്‍ഗ്രസില്‍ പരസ്യമായി തുടരുന്നതിനിടെയാണ് കൈയേറ്റ ശ്രമം.