കൊല്ലം: നാടന്‍ വാദ്യങ്ങളുടെ അകമ്പടിയോടെ ഹരിത എക്‌സ്പ്രസിലെ ഗായകസംഘം മണ്ണിന്റെ മണമുള്ള പാട്ടുകള്‍ ആലപിച്ചപ്പോള്‍ നാട്ടുകാരും വിദ്യാര്‍ഥികളും കയ്യടിച്ച് ഏറ്റുപാടി. താളവും പാട്ടും മുറുകുമ്പോള്‍ ചവറ പൊലിസ് സര്‍ക്കിള്‍ ഇന്‍സ്‌പെക്ടര്‍ ക്വാര്‍ട്ടേഴ്‌സ് പരിസരം കൃഷിയിടമായി മാറുകയായിരുന്നു. ഹരിത കേരളം മിഷന്റെ ഭാഗമായുള്ള പരിപാടി ജില്ലാ പഞ്ചായത്ത് പ്രസിഡന്റ് കെ. ജഗദമ്മ പച്ചക്കറിതൈ നട്ട് ഉദ്ഘാടനം ചെയ്തു. ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് സജ്ജീകരിച്ച പ്രദര്‍ശന വാഹനമായ ഹരിത എക്പ്രസും ഹരിത കേരളം മിഷന്റെ ഭാഗമായി ജില്ലയില്‍ ഇതുവരെ നടത്തിയ പ്രവര്‍ത്തനങ്ങളുടെ ചിത്രങ്ങള്‍ ഉള്‍പ്പെടുത്തി ജില്ലാ ഇന്‍ഫര്‍മേഷന്‍ ഓഫീസ് ഒരുക്കിയ ഫോട്ടോ പ്രദര്‍ശനവും പരിപാടിയെ കൂടുതല്‍ ശ്രദ്ധേയമാക്കി.
നാടിനെ കാര്‍ഷിക സ്വയംപര്യാപ്തതയിലേക്കും ശുചിത്വത്തിലേക്കും നയിക്കുന്നതിനായി സംസ്ഥാന സര്‍ക്കാര്‍ നടത്തുന്ന ഹരിത കേരളം മിഷനു കീഴില്‍ കൊല്ലം ജില്ലയില്‍ ഊര്‍ജ്ജിതമായ പ്രവര്‍ത്തനങ്ങള്‍ നടന്നുവരികയാണെന്ന് ജില്ലാ പഞ്ചായത്ത് പ്രസിഡന്റ് ഉദ്ഘാടനപ്രസംഗത്തില്‍ പറഞ്ഞു.
ജില്ലാ ഭരണകൂടം, ചവറ ബ്ലോക്ക് പഞ്ചായത്ത്, ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ്, പോലീസ് വകുപ്പ് എന്നിവ സംയുക്തമായാണ് പരിപാടി സംഘടിപ്പിച്ചത്. ചവറ ബി.എച്ച്.എസ്.എസിലെ നാഷണല്‍ സര്‍വീസ് സ്‌കീം ദശദിന ക്യാമ്പില്‍ പങ്കെടുത്ത വിദ്യാര്‍ഥികളാണ് പോലീസ് ക്വാര്‍ട്ടേഴ്‌സ് പരിസരത്ത് രണ്ടിടങ്ങളിലായി പച്ചക്കറി നടുന്നതിനായി കൃഷിയിടമൊരുക്കിയത്.
കരുനാഗപ്പള്ളി, കൊട്ടാരക്കര, ശാസ്താംകോട്ട, പത്തനാപുരം തുടങ്ങിയിടങ്ങളിലും ഹരിതകേരളം യാത്രക്ക് സ്വീകരണങ്ങളേര്‍പ്പെടുത്തി.