പൊന്നാനി: പൊന്നാനി ചന്തപ്പടിയില്‍ വീട് കുത്തിത്തുറന്ന് മോഷണം. ഒരു ലക്ഷം രൂപയുടെ ആഭരണങ്ങളും ലാപ്‌ടോപ്പും നഷ്ടപ്പെട്ടു. ചന്തപ്പടി പൗര്‍ണമി തിയറ്ററിനടുത്തുള്ള മസീറ മന്‍സിലില്‍ രായിന്‍വീട്ടില്‍ കബീറിന്റെ വീട്ടിലാണ് മോഷണം നടന്നത്.
ചൊവ്വാഴ്ച രാത്രി വീട്ടുകാര്‍ ബന്ധുവീട്ടില്‍ പോയ സമയത്താണ് മോഷണം നടന്നത്. വീടിന്റെ വടക്കുഭാഗത്തെ ജനല്‍ തകര്‍ത്തശേഷം അകത്തുകടന്ന മോഷ്ടാവ് അലമാര കുത്തിത്തുറന്നാണ് മോഷണം നടത്തിയിരിക്കുന്നത്. വസ്ത്രങ്ങളും മറ്റും വാരിവലിച്ചിട്ട നിലയിലാണ്. പെട്ടിക്കകത്തു സൂക്ഷിച്ചിരുന്ന ഒരു ലക്ഷം രൂപ വിലവരുന്ന ഡയമണ്ട് ആഭരണങ്ങളും ലാപ്‌ടോപ്പുമാണ് അപഹരിച്ചത്.
കഴിഞ്ഞ ദിവസം ഉച്ചയോടെ വീട്ടുകാര്‍ വീട്ടിലെത്തിയപ്പോഴാണ് മോഷണവിവരം അറിഞ്ഞത്. തുടര്‍ന്നു പൊലിസില്‍ പരാതി നല്‍കുകയായിരുന്നു. പരാതിയുടെ അടിസ്ഥാനത്തില്‍ ഡോഗ് സ്‌ക്വാഡും വിരടലടയാള വിദഗ്ധരും സ്ഥലത്തെത്തി പരിശോധിച്ചു. പൊലിസ് നായ മണംപിടിച്ച് തൃക്കാവ് അമ്പല സ്റ്റോപ്പിലെ ആല്‍ത്തറവരെ എത്തിയെങ്കിലും തിരിച്ചുവന്നു.
മോഷ്ടാവിനെക്കുറിച്ച് സൂചന ലഭിച്ചതായി പൊലിലിസ് പറയുന്നു. കഴിഞ്ഞ ദിവസം എടപ്പാള്‍ തട്ടാന്‍പടിയിലും മോഷണം നടന്നിരുന്നു. പക്ഷേ, പ്രതികളെ പിടികൂടിയിട്ടില്ല.