മലപ്പുറം: നിര്‍ദിഷ്ട മലപ്പുറം മില്‍മ ഡെയറി പ്ലാന്റിന് പ്രതിദിനം ഒരു ലക്ഷം ലിറ്റര്‍ പാല്‍ സംസ്‌കരിച്ച് പാക്കറ്റുകളാക്കാനുളള ശേഷി ഉണ്ടാവും. മൂര്‍ക്കനാട് പൊട്ടിക്കുഴി എ.എം.എല്‍.പി സ്‌കൂളിന് സമീപമുള്ള 12.4 ഏക്കര്‍ സ്ഥലത്താണ് പ്ലാന്റ് പണിയുന്നത്. 60 കോടി രൂപയാണ് മൂന്ന് ഘട്ടങ്ങളിലായി പൂര്‍ത്തീകരിക്കാന്‍ ഉദ്ദേശിക്കുന്ന പ്ലാന്റിന് ചെലവ് പ്രതീക്ഷിക്കുന്നത്. മലപ്പുറം ജില്ലയിലെയും പാലക്കാട് ജില്ലയിലെ സമീപ പ്രദേശത്തു നിന്നുമുളള പാല്‍ ഈ പ്ലാന്റില്‍ സംഭരിക്കാനാണ് പദ്ധതി. ക്ഷീര സംഘങ്ങളെ ഗ്രൂപ്പുകളാക്കി തിരിച്ച് പ്രാദേശിക ബള്‍ക്ക് മില്‍ക്ക് കൂളറുകളില്‍ ശീതീകരിച്ച് ഇന്‍സുലേറ്റഡ് സ്റ്റെയിന്‍ലെസ് സ്റ്റീല്‍ ടാങ്കറുകളിലായിരിക്കും പാല്‍ പ്ലാന്റില്‍ എത്തിക്കുക.
അധികമുളള പാല്‍, നെയ്യ്, തൈര്, സംഭാരം, വെണ്ണ മുതലായ ഉത്പന്നങ്ങളാക്കി മാറ്റുന്നതിനുളള സൗകര്യം ഈ പ്ലാന്റില്‍ ഉണ്ടായിരിക്കും. പദ്ധതിയുടെ ആദ്യഘട്ടമായി ചുറ്റുമതില്‍, അപ്രോച്ച് റോഡ്, ഫാക്ടറി കോംപൗണ്ടിനകത്തുള്ള റോഡുകള്‍ മുതലായവ തീര്‍ക്കും. രണ്ടാംഘട്ടത്തിന്റെ ടെണ്‍ണ്ടര്‍ നടപടികള്‍ പുരോഗമിക്കുന്നതേയുളളു. പ്രധാന ഫാക്ടറി കെട്ടിടം, ഓഫീസ് കാന്റീന്‍, ജോലിക്കാരുടെ വിശ്രമ മന്ദിരം, ഐസ് പ്ലാന്റ് കെട്ടിടം, ബോയിലര്‍ ഹൗസ്, മലിനജല സംസ്‌കരണ പ്ലാന്റ് മുതലായവ നിലവില്‍ വരും. മൂന്നാം ഘട്ടത്തിലായിരിക്കും യന്ത്ര സാമഗ്രികള്‍ സ്ഥാപിക്കുക.
ഇപ്പോള്‍ ജില്ലയില്‍ വിതരണം ചെയ്യുന്ന പാലും പാല്‍ ഉത്പന്നങ്ങളും വയനാട്, പാലക്കാട്, കോഴിക്കോട് പ്ലാന്റുകളില്‍ നിന്നാണ് എത്തുന്നത്. മലപ്പുറം ഡെയറി പ്ലാന്റ് പ്രവര്‍ത്തന സജ്ജമാകുന്നതോട് കൂടി, ഇത് പുര്‍ണമായും ജില്ലയില്‍ തന്നെ ഉത്പാദിപ്പിച്ച്, സംഭരിച്ച്, സംസ്‌ക്കരിച്ച് വിപണനം നടത്തുന്നതിന് സാധ്യമാവും.