കാഞ്ഞങ്ങാട്: സൗത്തിലെ മാതോത്ത് മഹാവിഷ്ണു ക്ഷേത്രത്തില്‍ കവര്‍ച്ച. വിഗ്രഹത്തില്‍ ചാര്‍ത്തിയിരുന്ന ഒന്നര പവന്റെ സ്വര്‍ണവും ആറു ഭണ്ഡാരങ്ങളും കടത്തിക്കൊണ്ടുപോയി. ഇന്നലെ പുലര്‍ച്ചെ ക്ഷേത്രത്തിലെത്തിയ പൂജാരിയാണു കവര്‍ച്ച നടന്നതായി കണ്ടെത്തിയത്. ഹൊസ്ദുര്‍ഗ് സി.ഐ സി.കെ സുനില്‍ കുമാറിന്റെ നേതൃത്വത്തിലുള്ള പൊലിസ് സംഘം ക്ഷേത്രത്തിലെത്തി. വിരലടയാള വിദഗ്ദ്ധരും സ്ഥലത്തെത്തി തെളിവെടുപ്പ് നടത്തി.
ഭണ്ഡാരങ്ങളിലായി മൊത്തം 40,000 രൂപയാണ് ഉണ്ടായിരുന്നതെന്നു ക്ഷേത്രാധികാരികള്‍ പൊലിസിനോടു പറഞ്ഞു. ഹൊസ്ദുര്‍ഗ് പൊലിസ് അന്വേഷണം ആരംഭിച്ചു. മോഷ്ടാക്കള്‍ കടത്തിക്കൊണ്ടുപോയ ഭണ്ഡാരങ്ങള്‍ കുത്തിപ്പൊളിച്ച് അടുത്തുള്ള പറമ്പില്‍ ഉപേക്ഷിച്ച നിലയില്‍ കണ്ടെത്തി. ഇവയിലെ പണമെടുത്ത ശേഷം പറമ്പില്‍ ഉപേക്ഷിച്ച നിലയില്‍ കണ്ടെത്തുകയായിരുന്നു.