കരുനാഗപ്പള്ളി: ഫയര്‍ഫോഴ്‌സ് കെട്ടിടം പണിയുന്നതിന് ആവശ്യമായ ഭൂമി വിട്ടു കൊടുക്കുവാന്‍ പഞ്ചായത്തുകളും മുനിസിപാലിറ്റികളും വിട്ടുവീഴ്ച്ചക്ക് തയാറാകണമെന്ന് കെ.സി വേണുഗോപാല്‍ എം.പി ആവശ്യപ്പെട്ടു.
പുത്തന്‍തെരുവ് ഗ്യാസ്ടാങ്കര്‍ ദുരന്തത്തിന്റെ 7-ാം ദുരന്തവാര്‍ഷികത്തോടനുബന്ധിച്ച് കെ.എസ് പുരം പൗരസമിതിയും സാധുജനസഹായസമിതിയും സംയുക്ത ആഭിമുഖ്യത്തില്‍ നടത്തിയ അനുസ്മരണസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കരുനാഗപ്പള്ളിയുടെ വികസന രംഗത്ത് ഏറെ പ്രാധാന്യമര്‍ഹിക്കുന്ന ഫയര്‍ഫോഴ്‌സ് കെട്ടിടം യാഥാര്‍ഥ്യമാക്കുന്നതിന് തന്റെ എല്ലാ സ്വാധീനങ്ങളും വിനിയോഗിക്കുമെന്ന് അനുമോദന ചടങ്ങ് ഉദ്ഘാടനം ചെയ്ത ആര്‍. രാമചന്ദ്രന്‍ എം.എല്‍.എ ഉറപ്പ് നല്‍കി.
ഗ്യാസ് ടാങ്കര്‍ ദുരന്തത്തില്‍ മരിച്ചവരുടെ കുടുംബങ്ങള്‍ക്ക് ഉപകാര സമര്‍പ്പണവും മാതൃകാപരമായി രക്ഷാപ്രവര്‍ത്തനം നടത്തിയ മുന്‍ കരുനാഗപ്പള്ളി എസ്.ഐ എം. അനില്‍കുമാറിനെയും കരുനാഗപ്പള്ളി ഫയര്‍ ഫോഴ്‌സ് ഓഫിസര്‍ വിശീവിശ്വനാഥനെയും ഫയര്‍മാന്‍ വിനോദിനെയും കുലശേഖരപുരം പുത്തന്‍ വീട്ടില്‍ തെക്കതില്‍ സജീവിനെയും ചടങ്ങില്‍ അനുമോദിച്ചു. പൗരസമിതി പ്രസിഡന്റ് കെ.എസ് പുരം സുധീര്‍ അധ്യക്ഷനായി. കെ.പി മുഹമ്മദ്, നീലികുളം സദാനന്ദന്‍, ഇസ്മയില്‍, എം.എ സലാം, എം.എ ലത്തീഫ്, ബോബന്‍.ജി നാഥ്, ഷംസുദ്ദീന്‍, പ്രസന്നാ ഗോപാലന്‍ തുടങ്ങിയവര്‍ സംസാരിച്ചു. വാര്‍ഷികത്തോട് അനുബന്ധിച്ച് പുത്തന്‍ തെരുവില്‍വെയിറ്റിങ് ഷെഡ് സ്ഥാപിച്ചു.